Како што информираат од Државниот испитен центар (ДИЦ), средната оценка на екстерните испити од прелиминарните резултати е 3,78 и е повисока во однос на минатата година кога изнесуваше 3,61
Денеска точно напладне, во 12 часот, ќе бидат објавени прелиминарните резултати од испитите по државната матура – 12 дена порано од законскиот рок, информира Државниот испитен центар (ДИЦ).
Како што информираат оттаму, резултатите се веќе испратени во училиштата, а секој кандидат со најава на http://rezultati.dic.edu.mk да ги види своите резултати.
Од ДИЦ посочуваат дека средната оценка на екстерните испити од прелиминарните резултати е 3,78 и е повисока во однос на минатата година кога изнесуваше 3,61.
„Следува период на приговори, односно заклучно со 5 јули 2022 година учениците може да поднесуваат приговори во училиштата. Резултатите од приговорите ДИЦ ќе ги објави на 11 јули 2022 година. Увидот во тестовите лично од страна на кандидатите е на 13 јули во ДИЦ, по предходна најава и закажување термин телефонски на 12 јули 2022 година“,
напоменуваат од Државниот испитен центар.
Оваа година, како што нагласуваат од ДИЦ, државната матура се реализираше во согласност со договорот со средношколците, односно два екстерни, два интерни предмети и проектна задача и скратени испитни програми.