Хоуп Караскила беше принудена да ја напушти директорската позиција во училиште во САД затоа што дел од родителите се пожалија дека на часови на уметност на децата им биле прикажани порнографски материјали. Стануваше збор за ренесансни ремек-дела, како голиот Давид на Микеланџело
Поранешната директорка на училиште во Флорида, Хоуп Караскила, ја посети Фиренца, Италија. Таму е на покана на директорката на музејот „Академија Галерија“, Сесил Холберг. А во галеријата се наоѓа скулптурата Давид на Микеланџело.
„Тоа што најмногу ме импресионира е што целава галерија е направена за него. Нема ништо погрешно во човековото тело само по себе. Микеланџело ќе направел неправда ако го извајал на кој било друг начин. Мислам дека е прекрасен“,
изјавила Караскила за Би-Би-Си.
Случајот на Хоуп Караскила и училиштето кое го водеше го обиколи светот пред неколку месеци. На часовите по уметност, на деца на возраст од 11 и 12 години, им биле прикажани ремек-дела, меѓу кои и Давид на Микеланџело. Познатата скулптура на библискиот лик кој го победил Голијат, го прикажува Давид гол. Другите дела кои содржеле голотија била сликата „Создавањето на Адам“, исто така од Микеланџело“ и „Раѓањето на Венера“ од Ботичели.
По часот, еден родител се пожалил до училишниот одбор дека материјалот бил „порнографски“ додека други се пожалиле дека сакале да бидат информирани за лекциите, пред тие да бидат оддржани. Веднаш потоа, без објаснување, училишниот одбор побара оставка од Караскила.
Настанот предзвика силни меѓународни критики на сметка на училишниот одбор и родителите.