Случајот со починатата пациентка од Струга детално ќе се истражува, а веќе се води и постапка од Јавното обвинителство во Охрид
Директорката на болницата во Охрид утре ќе биде разрешена поради случајот со починатата жена од Струга, која и покрај тоа што имала приоритетен упат од матичен лекар, не била хоспитализирана на Инфективното одделение во Охрид.
Жената се жалела на болки, тешко дишела, а во меѓувреме ги чекала и резултатите од тестот за коронавирус.
Како што информираше министерот за здравство, Венко Филипче, утре ќе биде поставен нов директор, а согласно сите информации ќе се продолжи да се постапува по овој случај.
„Во текот на денешниот ден во тамошната болница на увид се инспектори од Државниот санитарен и здравствен инспекторат за утврдување на улогата и одговорноста на сите други вклучени во целиот овој процес. Во меѓувреме, покрената е и постапка и апелирам до институциите детално да се следи случајот“,
додаде Филипче.
Починатата 66-годишна стружанка на 24 март закажала тестирање преку матичниот лекар, материјал и бил земен два дена подоцна, а резултатот бил познат завчера. Било препорачано хоспитализирање, но тоа не се случило, поради што Министерството за здравство најави ревизија на случајот за да се утврди дали имало лекарски пропуст.
Нејзиниот зет вчера сведочеше дека иако отишле во охридската болница, пациентката не била примена, а им било посочено да се вратат кога ќе имаат позитивен резултат на тестот од коронавирусот. Пациентката починала чекајќи ги резултатите од тестот.
Во меѓувреме Основното јавно обвинителство во Охрид отвори предмет по допрен глас за овој случај.