Договорот за пријателство со соседна Бугарија зборува за заедничка историја што ги поврзува двата народа. Во 21 век во Европа, правото на самоопределување и самоизјаснување не може да биде спорно, изјави за Радио Слободна Европа вицепремиерот за европски прашања, Никола Димитров, по изјавата на бугарскиот министер за одбрана Красимир Карачанов дека Бугарија ќе ја блокира првата меѓувладина конференција на Северна Македонија со ЕУ, ако Мешовитата комисија не постигне согласност за отворените историски прашања.
Димитров за РСЕ рече дека, имајќи ја предвид визијата за заедничка европска иднина како блиски народи и соседи, убеден е дека со заеднички сили треба да се работи на решенија кои ќе обезбедуваат почит и достоинство за двете страни.
„Тоа е одговорна и зрела политика, тоа се европските вредности. Изјави што може да предизвикаат навреда или вознемиреност кај соседите не помагаат. Историјата ќе не’ памети според тоа како сме се однесувале кон иднината“,
изјави Димитров.
Според него, прифаќањето на минатото, но и на сегашноста, е еден благороден процес што е започнат со Бугарија, кој мора да се темели токму на ова право, како за хероите од минатото кои се од големо значење за двете страни, така и за денешните генерации.
Истакна дека Договорот зборува за заемно почитување и пријателство, како и за помош од страна на Софија на патот на Северна Македонија кон членството во ЕУ.
Бугарскиот вицепремиер и министер за одбрана Красимир Каракачанов во изјава за ТВ 24 најави дека неговата земја ќе ја блокира првата меѓувладина конференција на Северна Македонија со ЕУ ако не се постигне согласност во разговорите во рамки на Мешовитата експертска македонско-бугарска комисија за историски прашања.
Тој ги обвини макеоднските власти за некоректност и за избегнување за решавање на проблематичните прашања и на средбите на Комисијата, истовремено очекувајќи поддршка од ЕУ.
Кон крајот на минатата година, на барање на македонската страна, беше побарана привремена пауза во работата на Мешовитата македонско-бугарска комисија за историски прашања поради изборите, кои потоа беа одложени поради ковид-кризата.
Комисијата заглави на прашања за Гоце Делчев и за други личности и настани од крајот на 19 и почетокот на 20 век, кои Бугарија потоа ги издигна на највисоко политичко ниво и ги постави како услов без чие исполнување нема да дозволи напредок на преговорите за членство на Северна Македонија во ЕУ.