Наспроти новиот вицепремиер за европски прашања, кој вели дека е затворено едно од прашањата што беа отворени меѓу двете земји, неговиот претходник смета дека земјава направила отстапка, без Бугарија да возврати соодветно
Досегашниот вицепремиер за европски прашања, Никола Димитров, и неговиот наследник ма функцијата во новата Влада, Бојан Маричиќ, низ различна „диоптрија“ гледаат на потегот за кој денеска известија премиерите на Северна Македонија и на Бугарија, Димитар Ковачевски и Кирил Петков: Дека Бугарија прифаќа да го користи краткото име на нашата земја (Северна Македонија), подеднакво како и долгото (со Република), а откако од наша страна била испратена дипломатска нота до ОН дека немаме територијални претензии.
Наспроти новиот вицепремиер Маричиќ, кој вели дека е затворено едно од прашањата што беа отворени меѓу двете земји, Димитров смета дека земјава направила отстапка, без Бугарија да возврати соодветно.
„Со заеднички чекори од двете страни, решено е едно отворено прашање кое ни претставуваше проблем во дел од меѓународните организации“,
вели вицепремиерот за евроинтеграции Бојан Маричиќ во врска со одлуката на Бугарија да го користи скратеното име на нашата држава – Северна Македонија.
Ова, според него, е гест на добра волја од двете страни за да се стекне натамошната доверба.
„Со овој чекор, кој е едно од отворените прашања, решаваме еден проблем – затвораме едно прашање и креваме една од блокадите. Со ова се затвора еден проблем. Бугарија практично ја менува својата позиција и почнува да го користи краткото име. И премиерот Петков денеска неколку пати го употреби скратеното име – Северна Македонија. Решено е едно отворено прашање кое нам ни предизвикуваше проблем во дел од меѓународните организации. Ова е тема која скоро две години е отворена и со неа се оспоруваше нашето право да се нарекуваме со кратко име“,
рече Маричиќ во интервју за Телма.
Димитров, пак, исто така, во гостување на „Топ-тема“ на Телма рече дека во однос на тактиката заеднички став бил „ништо не е договорено додека не е договорен цел пакет и затоа ништо не може да се спроведува“.
Тоа што посебно, како што рече, денеска му пречи, и чувствува разочараност, е затоа што сме имале позиција во целиот период, градејќи ги преговорите со Бугарија, дека ништо не е договорено, додека се не е договорено, така што, според него, не може да почнат да се прават отстапки само од едната страна.
„Ако денот по утрото се познава, ако едната страна прави отстапки, а другата страна си стои и не мрда, тогаш ова може само да води, за жал, кон целосен пораз и целосна победа“,
изјави Димитров, додавајќи дека краткото и долгото име биле една од петте точки, а таа точка сега не постои.
Според Димитров, ние не само што направивме чекор и отстапка, како што рече, туку тоа и го имплементиравме: Нотата во ОН е дадена, за возврат немаме обезбедено ништо. Но, тоа да се сврти како Бугарија да направила отстапка, истакна, е несериозно и безобразно.
Тој наведе дека предупредил на ова на прес-конференција споменувајќи ја македонската нота до ОН околу краткото и долгото име на државата.
„Прашав дали се размислува тоа да се направи и кажав дека тој чекор ќе ја ослаби македонската преговарачка позиција“,
рече Димитров.