Според членот од СДСМ, Борис Кондарко, мислењето до шефот на државата го потпишал и претседателот на ДИК, Оливер Деркоски, кој сега зборува друго, тврдејќи дека за ажурирање на Избирачкиот список се потребни 45 дена
Државната изборна комисија денеска му доставила мислење на претседателот Стево Пендаровски во врска со изборниот процес и временската рамка која е потребна за тоа, во кое е потенцирано дека ДИК смета оти е потребно Владата да донесе нова уредба со законска сила и да пропише нови рокови за Избирачкиот список и за увидот во него. Таа уредба, стои во мислењето на ДИК, треба да биде приспособена на сегашната фаза во која се наоѓаат изборите.
Ова денеска за МИА го изјави членот на ДИК, Борис Кондарко, кој напомена дека мислењето веќе е доставено, на него потпис има ставено претседателот на Комисијата, Оливер Деркоски, но сепак тој денеска дал изјава која не соодветствува со она што претходно го потпишал.
„Ниту претседателот ниту членовите на ДИК немаат законски овластувања да кажуваат по кои рокови ќе се спроведуваат дејствијата за Избирачкиот список и за јавниот увид. ДИК не е законодавец и токму и затоа во одговорот до претседателот на државата, потпишан од претседателот на ДИК јасно потенциравме дека ДИК смета оти е потребно Владата да донесе нова уредба и да пропише нови рокови за Избирачкиот список и за увидот и таа уредба за биде приспособена на сегашната фаза во која се наоѓаат изборите“,
вели Кондарко.
Според него, „не е точно барањето на Деркоски за нови 45 дена за јавниот увид и списокот“. Со повикувањето на сегашните одредби Деркоски се демантира самиот бидејќи во дописот до претседателот на државата ДИК бара од Владата да се определат нови рокови за овие дејствија, кои логично е да бидат пократки, додава Кондарко.
Истовремено, вели Кондарко, ваквото барање на Деркоски е демантирано и од Уставниот суд, кој одлучи дека не може да се повторуваат одново дејствијата со нови 45 дена, колку што бара претседателот на ДИК, туку процесот да продолжи 22 дена по завршување на вонредната состојба.
Претседателот на ДИК претходно во изјава за дел од медиумите рече дека Избирачкиот список треба да помине низ истата процедура на прочистување и дека таа процедура, заедно со изборната кампања, трае од 45 до 50 дена.