Се што презедовме до 22 март, сите дејствија, согласно со Изборниот законик, се важечки и ќе се употребат за продолжување на изборите, објаснува Јанаке Витановски, еден од членовите на Комисијата
Од 22 март изборната администрација не презема никакви дејствија поврзани со десеттите парламентарни избори. За да продолжиме со работа ќе чекаме нова владина уредба, вели Јанаке Витановски, член на Државната изборна комисија, во однос на изборите за нов собраниски состав, што техничката влада ги „замрзна“ поради кризата со коронавирусот.
„Изборите требаше да бидат на денешен датум – 12 април, ама коронавирусот ги одложи. ДИК на 22 март донесе Заклучок, а согласно Уредбата на Владата, така што ги запревме сите дејствија за спроведување на изборите. ДИК ги запре и сите изборни дејствија на општинските изборни комисии. Од 22 март, ДИК не презема никакви изборни дејствија и ќе чека нова уредба од Владата за да продолжи со работа“,
вели Витановски за „360 степени“.
Тој објаснува дека ДИК сега ја чува и обезбедува целата изборна документација до продолжување на спроведувањето на изборните дејствија и изборите.
„Се што презедовме до 22 март, сите дејствија, согласно со Изборниот законик, се важечки и ќе се употребат за продолжување на изборите“,
вели Витановски и набрројува дека остануваат валидни регистарот на медиуми, највисоката и најниска цена по секунда за платено политичко рекламирање, составот на општинските изборни комисии и на избирачките одбори…
Членот на ДИК посочува дека, почнувајќи од 16 февруари, кога беа распишани изборите, ДИК спроведе повеќе дејствија, како што е јавниот увид во избирачкиот список и одлуката да нема избори во дијаспората, поради мал број пријавени гласачи… Потоа, вели, беше објавен описот на избирачките места, се потврдија 15 кандидатски листи, се извлекоа редните броеви на партиите на гласачкото ливче…
„Сите преостанати изборни дејствија што произлегуваат од Изборниот законик ќе бидат предвидени во ревидираниот роковник што ДИК треба да го донесе веднаш по укинувањето на вонредната состојба и согласно со нова уредба на Владата во која ќе биде утврден датумот на изборите. ДИК е спремна за продолжување на изборите, но кога ќе продолжиме ние не знаеме. Тоа зависи од укинувањето на вонредната состојба и од уредбата на Владата,“
вели Витановски.
*поврзани вести: Целата Уредба со која се запираат изборните дејства
Наместо денеска, изборите може да се одржат најрано во првата половина на јуни