На решението на претседателот на судот кусо реагираше Шврговски. Тој рече оти е непријатно изненаден бидејќи претходно друг судија се иззел од судечкиот совет кој постапува во овој предмет затоа што бил дел во претходна постапка во предметот
Претседателот на Основниот кривичен суд Скопје, Иван Џолев, го одби барањето за изземање на судијата Илија Трпков, кој претседава со петчлениот судски совет во случајот„Таргет-Тврдина“, што на почетокот на денешното рочиште го побара бранителот на обвинетиот Тони Јакимовски, адвокатот Љупчо Шврговски.
Судијата Трпков по ова констатира дека со одбивањето на барањето нема пречки главната расправа од судскиот процес да продолжи.
На решението на претседателот на судот кусо реагираше Шврговски. Тој рече оти е непријатно изненаден бидејќи претходно друг судија се иззел од судечкиот совет кој постапува во овој предмет затоа што бил дел во претходна постапка во предметот.
„Долги години сме правници и знаеме да читаме закони. Толку имам да кажам”,
рече Шврговски.
Адвокатот на обвинетиот Тони Јакимовски бараше изземање на судијата Трпков затоа што бил дел од претходна постапка во која одлучувал за продолжување на притворот на Јакимовски.
По размената на реплики меѓу судијата и Шврговски, главната расправа продолжи со предлогот на Обвинителството, на Горан Грујевски и Никола Бошковски да им се суди во отсуство заради економичност на постапката, што со решение беше прифатено од судечкиот совет на чело со судијата Трпков.
Сепак, и по ова, судијата повторно даде пауза од еден и пол час бидејќи адвокатот Шврговски имал службени обврски во Апелацискиот суд. По паузата, како што најави судијата Трпков, главната расправа ќе продолжи денеска попладне со воведни зборови.