Претседателот на Собранието вели дека нема информации до каде се разговорите за влез на Алијансата на Албанците во Владата и нагласува дека тоа е работа на политичките партии
Постапката за уставни измени би требало да почне најдоцна во јуни или јули годинава за да заврши до ноември, кога завршува и скринингот од ЕУ. Не мислам дека избори ќе го решат проблемот со немањето доволно гласови за уставни измени, туку дека тоа ќе ја искомпиликува целата работа, рече на денешниот брифинг со новинарите претседателот на Собранието, Талат Џафери.
За тоа како да се надмине проблемот со мнозинството, спикерот посочи дека е потребно власта и опозицијата да седнат и да разговараат.
„Јас можам да распишам избори само во моментот кога ќе се согласат политичките партии да се распушти Собранието или кога ќе заврши мандатот во последните 90 дена. Во други услови партиите треба да излезат со соодветен предлог“,
рече Џафери.
Во однос на немањето услови за работа на Собранието, односно немањето кворум за седници, Џафери рече дека обврска на секој пратеник е да биде на работно место, без оглед дали е тоа мнозинството или опозицијата.
„Деловникот не вика дека има посебни права и обврски на мнозинството и посебни права на опозицијата, обврска за секој пратеник е да биде на работно место и да одлучува по односните прашања, а како ќе се однесуваат пратениците тоа си е веќе нивна одговорност“,
рече спикерот.
Се очекува претседателот на Собранието да свика нова средба во рамки на процесот „Жан Моне“, а неговите најави се дека до април или мај треба да се знае дали ќе има нов деловник или измени на постојниот и процесот да заврши со присуство на европратениците.
Претседателот на Собранието вели дека нема информации до каде се разговорите за влез на Алијансата на Албанците во Владата и нагласува дека тоа е работа на политичките партии. Сè додека пратеници од опозицијата не го известат дека се дел од мнозинството, тој ќе смета дека состојбата во парламентот е иста.
Џафери искажа добредојде за ново парламентарно мнозинство, појаснувајќи потоа дека секоја поддршка за работата на Собранието е добредојдена.
„Секако, очекувам од тие информации што ги имам и што одат работиве, верувам дека тоа ќе резултира со соодветно позиционирање на соодветниот субјект“,
вели претседателот на Собранието.
Од пратениците што ја поддржуваат т.н. „огнена група“ на ДУИ, Џафери вели дека на седници не доаѓа само Изет Меџити и оти доколку има некоја промена, тој ќе треба да го извести за неговиот статус. Другите пратеници од ДУИ кои се од „огнената група“ доаѓаат во Собранието.
Џафери не смета дека има потреба за седница за односите со Бугарија на која министерот за надворешни работи Бујар Османи би реферирал.