Ја чекаме одлуката на Уставниот суд, како ќе решат тие така ќе биде, одговараат од кабинетот на претседателот на Собранието Талат Џафери за порталот „Независен“ и притоа додаваат дека како институција не се над Уставниот суд.
Реакцијата од кабинетот на спикерот на парламентот се однесува на иницијатива поднесена со Уставниот суд со која се бара да оцени уставноста на одлуката за распуштање на Собранието, чие поништување би отворило пат за негово повторно свикување.
Џафери досега повеќепати изјави дека повторното свикување на Собрание е неуставно, иако такво барање поднесоа 35 пратеници.
Ставот на Џафери е ист со оној на лидерот на опозицијата Христијан Мицкоски, кој во повеќе наврати изјави дека распуштањето на Собранието е конечно и единствено тоа може да се конституира на нови избори. Тој денеска исто како и Џафери побара да се почека одлуката на Уставниот суд, пред да го соопшти ставот на партијата, иако алудираше дека и порано имало вакви иницијативи кои биле одбиени.
Од СДСМ сметаат дека е демократски и апсолутно корисно Собранието да биде свикано и да ги потврди одлуките за вонредната состојба,
Вчера телевизијата Телма објави дека судии во Уставниот суд планираат да им предложат на своите колеги да покренат иницијатива по службена должност за укинување на одлуката за распуштање на Собранието бидејќи сметаат дека е беспредметна.
Образложението е дека одлуката за распуштање на парламентот не резултираше со предвремени избори на 12 април.