Во Атина се одржува деветтата пленарна сесија на Парламентарното собрание на Процесот за соработка во Југоисточна Европа на тема „Целите на одржливиот развој на животната средина. Влијанието на кризата во Југоисточна Европа врз сигурноста за енергетско снабдување и земјоделските синџири“
Парламентарното собрание на Процесот за соработка во Југоисточна Европа продолжува да биде автентичниот глас на регионот и форумот во кој се одвива политичкиот и дипломатскиот дијалог помеѓу земјите членки на ова Собрание. Ова е местото каде што правиме напори да градиме добрососедски односи помеѓу нас и да соработуваме, затоа што со тоа се зацврстува стабилноста и безбедноста на регионот, кои се основните постулати на основачката повелба на Процесот од Букурешт. А тие се во моментов загрозени повеќе од кога било, и затоа овој денешен наш собир е повеќе од добредојден, рече на почетокот од обраќањето на претседателот на Собранието Талат Џафери на деветтата пленарна сесија на Парламентарното собрание на Процесот за соработка во Југоисточна Европа што се одржува во Атина на тема „Целите на одржливиот развој на животната средина. Влијанието на кризата во Југоисточна Европа врз сигурноста за енергетско снабдување и земјоделските синџири“.
Џафери потсети дека Република Северна Македонија, е една од 193 земји кои и официјално ги усвоија Целите на одржливиот развој од Агендата 2030 за одржлив развој, која што беше усвоена на Генералното собрание на Обединетите нации во септември 2015 година – збир од 17 сеопфатни цели за одржлив развој, придружени со 169 специфични цели, чија крајна цел е искоренување на сиромаштијата, крај на нееднаквоста, градење мир и справување со климатските промени до 2030 година, притоа осигурувајќи дека никој нема да биде изоставен.
Понатаму тој ја истакна улогата на пратениците заедно со извршната власт за националниот напредок кон постигнување на целите на одржливиот развој.
„Свесни сме дека во моментов сме среде глобална криза од неодамнешните предизвици на главните аспекти во секојдневниот живот, меѓутоа, и на тоа дека постојат современи закани за човековите права. Тоа е мотив плус да соработуваме уште поинтензивно. Да се консултираме, да размениме мислења и искуства за поефективно постигнување на целите на одржливиот развој, меѓутоа да внесеме и иновации и техничка поддршка за неоптоварен промет на есенцијалните земјоделско – прехранбени продукти, со употреба на постојните регионални платформи, како и механизмите на Европската унија“,
рече тој.
Тука тој потсети на ветото од Бургија кое го оневозможува одржувањето на првата меѓуладина конференција на С Македонија со ЕУ.
„Тоа што го очекуваме од ова Парламентарно собрание е да продолжи да дава поддршка во согласност со правото и вредностите на Европската унија, на кои и се заснова. Затоа што, само заедно, солидарно и на еднакво рамниште ќе можеме да се справиме со сите предизвици кои ги предизвикуваат ефектите што климатските промени ги носат во различните сфери од животот, меѓу кои предничат и безбедноста на снабдувањето со енергија и земјоделско – прехранбениот синџир. Ние не можеме да бидеме ниту слепи, ниту имуни на тие закани. Глобалните, регионалните и националните трендови што се појавуваат, влијаат и врз развојот на Северна Македонија. Јас не сакам да звучам песимистички, меѓутоа, предвидувањата се дека енергетската и прехранбената криза нема да се намалат, туку напротив, ќе се зголемат. Ние мораме да бидеме подготвени заеднички, координирано и со што помалку штети да ги надминеме тие предизвици. Затоа, синергијата што се воспоставува на овој форум и на сите други меѓународни форуми е од суштинска важност за развој и благосостојба на државите и нашите граѓани“,
рече Џафери., изразувајќи надеж дека заеднички и консензуално ќе ја усвоиме и Декларацијата.