„Имам добиено извештаи од учесници во изборниот процес за вознемирување во однос на обиди за изборен инженеринг со вонинституционален, меѓупартиски договор за гласање и надгласување во ДИК во врска со симптоматичните приговори поднесени од страна на учесниците во изборите“, изјави техничкиот премиер на денешната прес-конференција
Техничкиот премиер Талат Џафери попладнево на прес-конференција кажа дека од учесници во изборите добил извештаи за обиди за изборен инженеринг со цел менување на соодносот на бројот на пратеници во Собранието.
„Во својство на премиер на Владата и одговорен за успешноста на изборниот процес имам добиено извештаи од учесници во изборниот процес за вознемирување во однос на обиди за изборен инженеринг со вонинституционален меѓупартиски договор за гласање и надгласување во Државната изборна комисија во врска со симптоматичните приговори поднесени од страна на учесниците во изборите. Според извештаите, овие претензии се изборен инженеринг и имаат за цел менување на соодносот на бројките во Собранието преку политички договор на маса“,
изјави Џафери на прес-конференцијата во Владата.
Во однос на добиените извештаи, ги повика институциите, а особено Управниот суд, да ја штити кредибилноста на изборниот процес, која, како што рече, е прифатена и поздравена од сите политички субјекти и од меѓународниот фактор, и да постапи законски и без партиски или политички директиви од која било страна. Со тоа, како што рече, нема да се фрли дамка врз волјата на граѓаните изразена на изборите.
Коалицијата „Европски фронт“ предводена од ДУИ, но и коалицијата „Вреди“ на опозициските партии на Албанците, најавија дека ќе поднесат тужби до Управниот суд во однос на одлучувањето на Државната изборна комисија (ДИК) за нивните приговори за резултатите од парламентарните избори.
Од „Европскиот фронт“ вчера најавија дека пред Управен ќе ги обжалат одлуките на ДИК што се однесуваат на петтата и шестата изборна единица. Коалицијата предводена од ДУИ е на став дека на членовите на Државната изборна комисија им бил извршен политички притисок преку партиски инструкции во однос на приговорите, а за ова, како што рекоа, ги информирале сите надлежни институции и меѓународниот фактор.
До овој момент, Управниот суд има оформено предмет само за поднесената тужба од коалицијата „Вреди“ против одлуката на ДИК за гласањето во Долна Бањица, Гостиварско.