Собранискиот спикер изразил надеж дека следи успешна и плодна соработка, како и успешно завршување на преговорите што ќе води кон полноправно членство на Република Северна Македонија во ЕУ
Собранието ја задолжи Владата во текот на преговорите со Европската Унија (ЕУ) доследно да се придржува кон определбата за безусловно почитување на идентитетските, јазичните, културните и историски особености на македонскиот народ, потенцирал претседателот на Собранието, Талат Џафери на денешната средба со членовите на работната група при Советот на ЕУ која е надлежна за земјите кои преговараат за пристапување и членство во ЕУ (КОЕЛА).
Како што се наведува во соопштението од собраниската прес-служба, Џафери го потенцирал своето задоволство што конечно со почетокот на оваа соработка се потврдува и почетокот на пристапните преговори со ЕУ.
„Претседателот Џафери пред членовите на оваа работна група ги потенцираше исто така и долгите преговори и консултации околу преговарачката рамка кои резултираа со заклучоците што ги донесе Собранието. Со нив ја задолжи Владата во текот на преговорите доследно да се придржува кон определбата за безусловно почитување на идентитетските, јазичните, културните и историски особености на македонскиот народ“,
се наведува во соопштението.
Собранискиот спикер изразил надеж дека следи успешна и плодна соработка, како и успешно завршување на преговорите што ќе води кон полноправно членство на Република Северна Македонија во ЕУ.
Како што информира прес-службата на Џафери, за време на состанокот благодарност упатил и шефот на Делегацијата на ЕУ во Република Северна Македонија, амбасадорот Дејвид Гир.
За време на состанокот, стои во соопштението, евроамбасадорот Гир го потенцирал, според него, историскиот момент што се случи во јули оваа година со отпочнување на преговорите со Европската унија, а оваа средба во Собранието ја опишал како симболичен почеток и промена која ќе резултира со пристапување кон институциите на ЕУ.
Работната група за проширување и за земјите кои преговараат за пристапување во ЕУ е во дводневна посета на земјава на средби со државниот врв.
Претседателот на Владата на Република Северна Македонија, Димитар Ковачевски, придружуван од заменикот на претседателот на Владата Бојан Маричиќ и од министерот за надворешни работи Бујар Османи, денеска се сретна со делегатите од 27-те земји членки на ЕУ во Работната група на Советот на ЕУ, предводена од Јавурек Леош и придружувани од амбасадорот на ЕУ во земјава, Дејвид Гир.
Пораката што е испратена на денешната средба, од страна претставниците на Работната група КОЕЛА, е дека земјите членки на ЕУ го охрабруваат натамошниот процес на патот на нашата држава кон ЕУ и дека цврсто стојат до нашата земја.
Инаку, станува збор за прва работна посета на КОЕЛА на земјва, која доаѓа како резултат на отворањето на пристапните преговори на ЕУ со Северна Македонија во јули.
Воедно, делегатите од КОЕЛА ќе разменат мислења и со претставници на граѓански организации.
Инаку, КОЕЛА е тело на Советот на ЕУ, составено од дипломати од сите земји членки на ЕУ, а е задолжено за процесот на проширување и односите со земјите кандидати кои преговараат за нивно пристапување во ЕУ.
Со работната група претседава ротирачкото претседателство на Советот на ЕУ, а во втората половина од 2022 година со телото претседава дипломат од Постојаната мисија на Чешката Република во ЕУ.