Курбан бајрам е празник на благодарноста и сакам да изразам благодарност кон сите здравствени работници, меѓутоа и кон сите други што секојдневно се вложуваат максимално да овозможат нормално функционирање во ова време на нова нормалност, вели во својата честитка Талат Џафери по повод празникот Курбан бајрам.
„Ви посакувам празникот да го поминете во добро здравје, на сите оние кои ги допре ковид-19 им посакувам брзо оздравување и што побрзо враќање во своите домови, за сите да го поминеме празникот опкружени со нашите блиски и сакани“,
вели Џафери.
Тој апелираше да се почитуваат мерките за заштита од ковид-19.
„Навикнати сме празникот да го поминеме опкружени со весел џагор и топли прегратки, искрени насмевки. За жал, речиси од почетокот на оваа година сме принудени да ги менуваме нашите секојдневни навики на функционирање и секако, празнување. Пандемијата на ковид-19 е тука и се чини ќе трае. Ние, и секако цел свет, се навикнуваме на нови начини на живот и работа. Покрај тоа, доколку до сега не научивме, сега се учиме на колективна свест и совест, за тоа колку е важно секој поединец да води сметка за своите постапки, за истите не рефлектираат негативно на нашите блиски семејства и на сите други. Да ги почитуваме препораките на здравствените институции, за да си помогнеме себеси и на нашиот здравствен систем“,
порача Џафери.