Конститутивната седница ќе продолжи штом, претседавачот на Собранието, Талат Џафери, ќе добие потврда дека партиите ги решиле двете останати прашања – избор на претседател на законодавниот дом и Комисија за избори и именувања.
Тој во изјава за ТВ Сител, рече дека не е и нема намера да биде причина за блокирање на институцијата и оти ги следи процедурите.
„Во моментот кога ќе има предлог дека се решени прашањата по однос на комисијата за избори и именувања и кандидат за претседател на Собранието, без разлика кој и да е тој, моја обврска според Деловникот е да продолжам со седницата за да може да се довршат тие точки. Јас во тој правец не правам никаков проблем“,
рече Џафери на дневникот на Сител ТВ.
Во однос на можноста за ротирачки премиер или ротирачки собраниски спикер, Џафери рече дека тоа е пакет на политички договор меѓу партиите кои прават мнозинство и во таа насока, како што рече, не се раководи од личните статусни прашања.
„Работата е политичка. Затоа се доделува мандат за состав на Влада и програма за работа на владата која се поднесува до Собранието. Ако во тие 20 дена преговори за состав на влада го имаат соодветното парламентрано мнозинство, во рок од 15 дена од приемот на предлог составот и програмата на Владата, Собранието треба да одржи седница и да избере влада. Доколку е политичкиот договор таков, тоа е неспорно“,
рече Џафери.
Прашан дали е оптимист дека до крајот на неделава е можен договор и продолжување на седницата, Џафери не одговори конкретно, само посочи дека во животот секогаш бил оптимист.
Талат Џафери минатата недела најави дека ќе свика продолжение на конститутивната седница дента кога претседателот Стево Пендаровски му го довери на лидерот на СДСМ, Зоран Заев, мандатот за составување влада, но подоцна се откажа, а следниот ден рече дека причината за откажување од намерата за продолжување на седницата биле семејни обрвски.