Брнз како амбасадорка во Скопје пристигна во 2019 година, а на нејзино место ќе дојде Анџела Прајс Агелер која на 5 август во американскиот Сенат беше потврдена за нова амбасадорка на САД во земјава
Претседателот на Собранието, Талат Џафери, денеска во неговиот кабинет, одржа проштална средба со амбасадорката на САД, Кејт Мари Брнз пред нејзиното заминување од земјава поради истекот на мандатот.
На средбата собранискиот спикер ѝ врачил признание за нејзиниот целокупен придонес.
„Претседателот Џафери ѝ се заблагодари на амбасадорката Брнз за нејзината значајна улога во унапредувањето на политичките процеси во земјата, како и за силната поддршка на процесотна интеграција во НАТО и ЕУ во текот на нејзиниот мандат, истакнувајќи дека Република Северна Македонија и САД негуваат извонредни билатерални односи“,
соопштија од кабинетот на Џафери.
Брнз, пак, констатирала дека во текот на нејзиниот мандат биле донесени неколку клучни одлучи во земјава и се случил историскиот настан – членството во НАТО.
„Таа изрази задоволство од можноста да биде дел од прогресот на земјата во целина и на Собранието. При тоа, го оцени како мошне успешно водството на Собранието од страна на претседателот Џафери и неговите напори да го подигне значењето на Собранието како законодавна власт и да ја зацврсти неговата независност. Брнз додаде дека сите се импресионирани од постигнувањата на Република Северна Македонија и нејзините перформанси како членка во НАТО“,
велат од Собранието.
Брнз како амбасадорка во Скопје пристигна во 2019 година, а на нејзино место ќе дојде Анџела Прајс Агелер која на 5 август во американскиот Сенат беше потврдена за нова амбасадорка на САД во земјава.