Не е моја работа да обезбедувам кворум, пратениците имаат обврска да дојдат на работа, изјави денеска спикерот Талат Џафери коментирајќи ги проблемите околу обезбедувањето присуство на пратеници за одржување на пленарните седници.
„Сите ние баравме и добивме мандат од граѓаните. Впрочем, пратеничката функција се извршува професионално и тие за тоа земаат плата“,
рече Џафери.
Последната седница Собранието ја почна на 16 февруари, но, поради немање кворум, таа беше прекината уште пред усвојување на дневниот ред. Освен пратениците од опозицијата, на седницата не присуствувале и пратеници на ДУИ. На прашање дали ќе има некаква разврска за тоа што и пратеници на владејачката ДУИ не доаѓаат на работа, Џафери рече дека секако дека ќе има разврска.
Тој истакна дека нема најави дека пратеници на ДУИ би се одделиле во посебна пратеничка група и повтори дека сите што добиле мандат од граѓаните треба да бидат на своите работни места, независно од која партија се.
Претседателот на Демократски сојуз, Павле Трајанов, исто така, го известил Џафери дека ќе дејствува независно од пратеничката група на СДСМ, ама останува дел од парламентарното мнозинство.