Лекарот од Итната медицинска помош во Кавадарци во изјава за МИА информира дека се повредени жена и дете, на возраст од околу 30 и десет години
Возач загина, а повредени се жена и дете на возраст од околу 30 и 10 години во синоќешната сообраќајна несреќа на патот Прилеп-Градско.
Лекарот во Итна медицинска помош – Кавадарци, Ратко Грков, утрово во изјава за МИА информира дека повредените биле со видливи повреди.
„Возачот беше на околу 40 години, изваден е со помош на Противпожарната служба, бидејќи по сообраќајката беше приклештен во возилото. Беше неконтактибилен, во тешка општа состојба, со повеќе повреди по целото тело. Беше направена реанимација во кавадаречката болница, но, за жал, безуспешна“,
вели докторот.
Сопатничката била повредена, но во стабилна општа состојба, свесна и ориентирана во време и простор, без видливи скршеници. Повредено било и дете на возраст од околу десет години, со скршеници на двете бутни коски и десната подлактица.
„Сакам да им се заблагодарам на сите што синоќа беа учесници во сообраќајот по сообраќајката и се најдоа на самото место. Многу помогнаа, одамна не сум сретнал толку хумани луѓе. Тие дадоа несебична поддршка и им помогнаа многу на екипите на Брзата помош и на Противпожарната служба“,
нагласи Грков за МИА.
Вчера доцна попладне, на патот Прилеп-Градско, се случила сообраќајна незгода помеѓу ТМВ со полуприколка и ПМВ „голф“ управувано од Д.К. (1982) од Прилеп, кај кого вечерта е констатирана смрт. Две лица со повреди се пренесени во Клинички центар во Скопје.