Владата ќе може да носи уредби со законска сила и да менува законски одредби кои претходно се содржани во законите донесени од Собранието
Министерката за правда Рената Дескоска денеска потенцира дека со воведувањето на вонредната состојба вчера ништо практично не се променило во животот на граѓаните, туку дека таа била со цел да може Владата да добие поголеми овластувања и да може да носи уредби со сила на закон.
Таа на денешната прес-конференција со премиерот Оливер Спасовски објасни што таа ќе значи во однос на правата и слободите на граѓаните.
„Самото прогласување вонредна состојба не значи автоматска промена или ограничување на човековите права и правото на начин на живот, иако има уставна можност за ограничување на правата и слободите доколку има таква потреба“,
рече Дескоска.
Но таа беше децидна дека тие ограничувања во ниеден случај не смеат да бидат дискриминација по ниту една основа или нечовечко постапување.
„Ниедно ограничување на слободите и правата не смее да биде дискриминаторско по пол, раса, боја на кожа, вера, јазик, национално или социјално потекло, имотна или општествена положба. Во услови на вонредна состојба, ограничувањето не смее да се однесува ниту на правото на живот, ниту на забраната на мачење, ниту на правната одреденост на казнивите дела и казните, како и слободата на уверување, совест, мисла, јавно изразување мисла и вероисповед. Во услови на вонредна состојба не смее да има ниту нечовечко постапување и казнување. Заедничка заложба како влада е ограничувањето на правата да биде минимално и само кога е нужно“,
објасни Дескоска.
Таа истакна дека колку повеќе граѓаните се придржуваат до мерките што сега се на сила, толку нема да има потреба од дополнителни ограничувања на правата на граѓаните.
Уште еднаш потенцира дека самото прогласување вонредна состојба не значи забрана на движење, не значи полициски час, не значи затворање на продавници, односно не значи автоматско стапување во сила на нови мерки, туку остануваат да важат истите како и претходно.
Единствено што се менува е во однос на надлежностите на Владата кои се прошируваат.
„Носењето одлука за вонредна состојба беше потребно како можност за ефикасно регулирање на одредени прашања и поефикасно справување со епидемијата, да се помогне на економијата и секаде каде што епидемијата остава последици. Сега Владата ќе може да носи уредби со законска сила и да менува законски одредби кои претходно се содржани во законите донесени од Собранието. Уредбите со законска сила имаат еднаква правна важност како законите“,
објасни Дескоска.
Вонредната состојба има важност од најмногу 30 дена и доколку ситуацијата се смири таа ќе се прекине, но ако продолжи и вонредната состојба ќе биде продолжена со нова одлука.