До започнувањето на функционирањето на јавното регионално претпријатие ЗЈП „Русино/Полог“ и проектните активности за изградба на Русино во стандардна депонија со сите придружни заштитни мерки согласно законот, обврската за оперирање со постоечката локација во Русино е сè уште надлежност на Општина Гостивар и ЈКП „Комуналец“ од Гостивар, се огласи денеска Владата.
Оттаму укажуваат дека Општина Гостивар, преку ЈКП „Комуналец“ од Гостивар има обврска да наплаќа за секој тон депониран отпад кој се одлага на Русино и со тие средства да ја одржува локацијата, со минимални технички услови за заштита на животната средина, спречување на влез на неформални лица, обезбедување од пожари и слично.
Ресорното министерство и Владата укажуваат дека досега се ангажирале да помогнат во воспоставувањето на системите во сите плански региони преку изнаоѓање на финансиски средства, чие оперирање понатаму сепак ќе биде обврска на општините, здружени преку Меѓуопштински Одбор за управување со отпад и Јавно регионално претпријатие.
За Источниот и Североиосточниот регион, како што обелоденуваат од Владата, обезбедени се средства преку ИПА 2 програмата. За Југозападниот, Пелагонскиот, Вардарскиот и Југоисточен регион се планираат средства преку ЕБРД, а за полошкиот плански регион се добиени средства од швајцарската влада.
„Што се однесува до полошкиот регион, беа обезбедени средства за подготовка на Регионален план за управување со отпадот и Стратегиска оцена на влијанието врз животната средина. Во согласност со планот, МЖСПП блиску соработува со Швајцарскиот секретаријат за економски прашања (SECO) за инвестирање на 8 милиони евра за изградба на централен објект за управување со отпад –регионална депонија за комунален отпад во Русино, на местото на постоечката нестандардна депонија што ќе ги опслужува граѓаните во сите општини во регионот и изградба на 2 трансфер станици со вкупно инвестициони трошоци од еден милион евра“,
појаснуваат од Владата.
Владата информира дека досега не ги одземала ингеренциите за управување со отпадот на ниту една општина во земјата а надлежноста и обврските за собирање, селектирање, транспорт и депонирање на комуналниот отпад, како и одржување на нестандардните локации за отстранување на отпадот се на единиците на локалната самоуправа, односно општините.
„Законот за управување со отпадот ја дава единствено можноста Владата да ја преземе обврската за воспоставувањето на регионалниот систем, доколку општините не го сторат тоа самостојно. Донесувањето на „Одлука за давање согласност” од страна на Советот на Општината никако не значи одземање на ингеренциите за управување со отпадот, туку се однесува на одлуката за воспоставување на регионалниот систем за управување со отпадот, односно регионалната депонија и придружна инфраструктура“,
стои во владиното соопштение.
Инаку, утре во 19 часот во амфитеатарот во градскиот парк, Општина Гостивар организира јавна дебата во врска со депонијата Русино.
На јавната дебата ќе присуствува градоначалникот Арбен Таравари, претставници на Центарот за развој на Полошкиот плански регион, претставници на Министерство за животна средина и просторно планирање и претставници на EAER/SECO.
Стотици револтирани граѓани претходно излегоа на протест поради депонијата, на која велат дека се носи ѓубре од вкупно девет општини во околината.
Од иницијативата „Стоп Русино“ побараа да сопре горењето на депонијата, да се прекине со носењето ѓубре таму и да се најде нова локација, поради, како што велат, Русино е преполно и нема веќе место за ѓубре. Тие побараа институциите да почнат да дејствуваат, во спротивно изјавија дека ќе го стопираат носењето ѓубре на депонијата.