Пораки дека јазикот и културата се фундаменти на секој народ и дека јазикот и идентитетот не се определуваат со договори и трактати, пристигнаа денеска од државниот врв по повод 22 Ноември – Денот на албанската азбука.
„Јазикот и културата се фундаменти на секој народ и нивната негација значи обид за ништење на националната припадност. Во 21 век таквите обиди не можат да наидат на плодна почва и ќе бидат осудени на неуспех“,
порача претседателот Стево Пендаровски во неговата честитка.
Претседателот на Собранието, Талат Џафери, пак, порача дека јазикот е дар и секој има аманет да го чува. Тој апелираше сите да го сакаат, чуваат и почитуваат стандардниот јазик.
Тоа, рече Џафери, нека биде јазикот на заемното поврзување и почитување.
И првиот заменик-премиер Артан Груби, во неговото обраќање испрати порака дека самоопределувањето на еден народ и јазикот не се предмет на договор.
„Принципот на самоопределување за етничката припадност, јазик и идентитет не може да се утврдат со договори и трактати, туку само врз принципите на божествениот закон“,
рече Груби.
Судбините на нашите народи во нашата земја, рече тој се меѓусебно поврзани и заедничко им е патешествието кон слободата, правдата, еднаквоста и интеграцијата.
Тој испрати и порака дека сите што го зборуваат албанскиот јазик имаат потполно одделена националност од сите други во Европа.
„Албанскиот народ зборува еден јазик што, настрана на природните трансформации на елементите од коишто ниту еден друг јазик не бил поштеден до денес, не може да се поистовети со другите келтски, латински, германски, словенски или хеленски јазици, освен таму каде што се среќава со нив со обединети индо-германски корени. Сите што зборуваат на овој јазик имаат националност потполно одделена и целосно одвоена од онаа на другите народи во Европа“,
рече Груби.
Вицепремиерот денеска промовираше и песна и спот со патриотски по повод Денот на албанската азбука, која ја отпеа Туна Сејдиу.
Во Собранието денеска беше доделена и државната награда „22 Ноември“, која годинава ја добија професорот, албанолог и академик, Џеват Лоши и книжевниот критичар, Али Алиу.