Агенцијата за управување со одземен имот претходно ја спроведе продажбата на три одземени недвижности од ексшефот на УБК, кои, според Агенцијата, ќе го зголемат државниот буџет во вкупен износ од 244 000 евра
По пат на електронско јавно наддавање, Агенцијата за управување со одземен имот денеска ќе изврши продажба на дел од одземениот недвижен имот на ексдиректорот на Управата за безбедност и контраразузнавање (УБК), Сашо Мијалков, конфискуван по спроведувањето на правосилната пресуда во предметот „Империја“.
Право на учество на јавното наддавање, како што соопштија од Агенцијата, имаат сите физички и правни лица освен осуденото лице од кого е конфискувана недвижноста, вработените во Агенцијата за управување со одземен имот, како и друго лице кое службено учествувало во постапката за продажба.
Агенцијата за управување со одземен имот претходно успешно ја спроведе и реализира продажбата на три одземени недвижности од ексшефот на УБК.
„Станува збор за три недвижности кои согласно правосилната судска пресуда КОК – ПП бр. 283/2022 се одземени од Сашо Мијалков. Реализираните парични средства од продажбата ќе го зголемат државниот буџет во вкупен износ од 15 000 500 денари или 244 000 евра“,
информираа од Агенцијата.
Во јули годинава на аукција на берза беа ставени и запленети акции на Мијалков.
Неодамна директорот на Агенцијата за управување со одземен имот Дритон Небиу објави дека вработените во Агенцијата се цел на закани и вознемирувања поради обидите да го продадат конфискуваниот имот што во моментов е ставен на аукција, а чија продажба се врши согласно правосилни судски одлуки.
Во моментов на аукција е недвижен имот на поранешниот директор на УБК, Сашо Мијалков, конфискуван од државата по спроведувањето на правосилната пресуда во предметот „Империја“. Мијалков во „Империја“ призна вина и се спогоди со Обвинителството, а казната беше три години затвор и одземање имот вреден околу 30 милиони евра, меѓу кои 25 стана и парцелата до хотелот „Мериот“.