Деканката Наталија Јовановиќ е повредена и се очекува да ѝ биде извршена интервенција во Ургентниот центар во Ниш
Деканката на Филозофскиот факултет во Ниш, Наталија Јовановиќ, утринава била нападната со нож од непозната жена во центарот на градот, пренесува „Н1“. На снимката која ја објави медиумот се гледа како група граѓани го одземаат ножот од напаѓачот, додека, пак, други граѓани ја преврзуваат раката на деканката. Според досегашните информации, очевидци за „Н1“ изјавиле дека на нападот ѝ претходел вербален напад од истата жена, која рекла дека ќе ѝ фрли киселина на Јовановиќ.
Набрзо по ранувањето, деканката со возило на Итната помош е пренесена во Ургентниот центар во Ниш, каде што ќе ѝ биде извршена интервенција. Нејзиниот споруг изјави дека Јовановиќ има исеченици на раката, кои ги добила во самоодбрана, и оти овој напад е продолжение на хајката на неговото семејство која српскиот претседател Вучиќ ја води против нив.
„Ја нападна со нож, а потоа Наталија се соочи со голи раце и во таа прилика беше исечена со нож во раката додека се бранеше. Овде сум. Чекам да видам што ќе се случи, а до мене е нејзината крвава марама. Таа крвава марама е продолжение на крвавите кошули и сите крвави работи што ни се случуваат, мене и на моето семејство, од рацете на претседателот на државата кој ја води против нас“,
кажа нејзиниот сопруг.
Жената која ја нападнала деканката набрзо по инцидентот била приведена од полицијата.
„Во моментов се работи на утврдување на сите факти и околностите за нападот кој се случи денес на плоштадот ‘Павле Стојаковиќ’, во кој беше нападната деканката на Филозофскиот факултет, а која во моментов се наоѓа во Универзитетскиот клинички центар во Ниш“,
соопшти српската полиција.