На претстојната седница на Советот на Град Скопје ќе се расправа за дополнителната листа на имиња на улици, плоштади, мостови и на други инфраструктурни објекти
Листата на имиња на улици, плоштади, мостови и на други инфраструктурни објекти на подрачјето на градот Скопје е дополнета со нови личности и настани кои оставиле белег во историскиот и културен контекст.
На дополнетата листа се наоѓаат имињата на култните македонски бендови „Леб и сол“, „Мизар“, „Лева Патика“…Понатаму, на листата се и имињата на Есма Реџепова, Дејвид Боуви, како и насловот на досега најуспешниот македонски филм, документарецот „Медена земја“. Целата листа може да се погледне тука.
На претстојната седница на Советот на Град Скопје ќе се расправа за дополнителната листа на имиња на улици, плоштади, мостови и на други инфраструктурни објекти на подрачјето на Град Скопје.
Како што информираат од Градот, постоечкиот регистар на имиња се предлага да биде дополнет со вкупно 571 име. Листата опфаќа имиња на истакнати личности од областа на градското, националното и светското културно и историско наследство, поважни настани од македонската и светската историја, имиња дадени според топоними на градови во земјата и регионот и други имиња.
„Со ова дополнување на листата предвидено е да се зголеми бројот на имиња на женски личности и настани кои оставиле белег во историски и културен контекст, како и на припадниците на немнозинските заедници кои живеат во Скопје, но и на бројот на топоними со регионално и светско значење. Од вкупно 571 име, 479 се имиња на истакнати личности од кои 79 се имиња на жени, додека пак останатите 92 имиња се имиња на поими кои означуваат поважни настани, топоними и други поими. Во дополнувањето на листата вратени се и имињата на улиците од периодот на солидарноста и изградбата на повоено Скопје, а кои беа отстранети со претходни одлуки на Советот на градот“,
се вели во соопштението.
Во 2019 година, Град Скопје спроведе анкета на која граѓаните ги дадоа своите предлози за имиња на градските улици, а листата беше дополнета и со други формално доставени иницијативи. Во листата се вклучени имињата на народни херои и други носители на позначајни државни одликувања, познати личности и настани од светската историја, имињата на скопските градоначалници, ректори на скопскиот универзитет, академици, државници, стопанственици, научници, спортисти, уметници и друго.
„Согласно Законот за определување на имињата на улици, плоштади, мостови и други инфраструктурни објекти името на улица, плоштад, мост и на друг инфраструктурен објект може да биде определено со географско, етнографско, историско и друго обележје, име на истакната личност од областа на историјата, науката и културата, други погодни имиња, како и име на значаен настан и датум, врз основа на листа на имиња. Законот предвидува две одделни постапки за утврдување на имиња и нивно задавање не конкретни топоними. Листата на имиња ја утврдува Советот на Град Скопје, по претходно добиена согласност од Владата. При утврдувањето на листата на имиња од страна на Советот на градот Скопје, општините од подрачјето на градот Скопје даваат мислење по истата“,
информираат од Град Скопје.
Сите идни промени на имиња на улици, плоштади, мостови и на други инфраструктурни објекти на подрачјето на Град Скопје согласно овој закон предвидено е да се црпат исклучиво од оваа листа.