Веќе неколку дена траат јавните препукувања меѓу пратеникот од ВМРО-ДПМНЕ, Бране Петрушевски и претседателот на ССМ, Слободан Трендафилов. Петрушевски го обвини раководството на Сојузот на синдикати на Македонија дека додека работниците се на минималец, тие примаат високи плати, како и дека некои негови членови остваруваат и други приходи што доаѓаат од активности надвор од работењето во ССМ. За Трендафилов, пак, е несериозно пратеник да осудува претседател на синдикати. Го повика пратеникот „од неговата плата да ми ги надополни овие 15 илјади денари кои ги немам и секој месец да имам 75 илјади денари за да не лаже“
Непочитувани пратеници, 120 вие, а 300 ние. Трипати повеќе од вас. Денеска дојдовме тука да побараме да донесете одлука минималната плата да изнесува не помалку од 500 евра и да се зголемат сите други плати за 100 евра. Ова денеска во обраќањето на јавната седница пред Собранието го рече претседателот на Сојузот на синдикатите на Македонија (ССМ), Слободан Трендафилов.
Сојузот на синдикатите на Македонија (ССМ), Слободан Трендафилов пред Собранието / Фото: Принтскрин
„Вашите сега 79 отсто зголемени плати не ги заслужувате. Затоа дојдовме тука ние да одлучиме за вас. Почитувани работници, да донесеме одлука пратениците да бидат на минимална плата до наредното зголемување на минималната плата“,
рече Трендафилов.
Констатира дека органите и телата на ССМ, на градските синдикати и борците за работнички права, едногласно донеле одлука пратениците да ги намалат луксузните плати на минимална плата.
„За крај, имам лично прашање. Бране на работа е или не“,
кажа Трендафилов.
Инаку, веќе неколку дена траат јавните препукувања меѓу пратеникот од ВМРО-ДПМНЕ, Бране Петрушевски и претседателот на ССМ, Слободан Трендафилов.
Петрушевски изминатите денови на прес-конференции зборува за висината на платата на синдикалните претставници. Го обвини раководството на Сојузот на синдикати на Македонија дека додека работниците се на минималец, тие примаат високи плати, како и дека некои негови членови остваруваат и други приходи што доаѓаат од активности надвор од работењето во ССМ.
За Трендафилов, пак, е несериозно пратеник да осудува претседател на Синдикати. Го повика пратеникот „од неговата плата да ми ги надополни овие 15 илјади денари кои ги немам и секој месец да имам 75 илјади денари за да не лаже“.
На почетокот на собирот пред Работничкиот сом, работниците со едноминутно молчење им оддадоа почит на загинатите во пожарот во Кочани.
Пред Стопанската комора, Трендафилов им порача на работодавачите да ги зголемат платите на работниците за да не бидат најголемите виновници за работничкиот егзодус.
„Подадената рака од работникот денес, може да стане стисната тупаница утре“,
вели тој.
Јавната седница на претставниците на ССМ заврши пред Владата.
„Тргнавме 300 од пред Работничкиот дом. Дојдевме над 1 000 пред Владата. Со време повлечете ја незаконската одлука за утврдување на висината на минималната плата. Со време намалете ги вашите плати на минимална плата. Да почувствувате како им е на работниците. Цела Влада на минимална плата“,
кажа претседателот на ССМ.
Додаде дека се на чекор од организирање на генерален штрајк.
