Претседателот на српскиот парламент вели дека владата не може да повлече закон кој е усвоен во Собранието, туку претседателот на државата треба да одлучи дали ќе го потпише
Претседателот на српското Собрание, Ивица Дачиќ, изјави дека владата не може да го повлече спорниот закон за експропријација, бидејќи тој е усвоен од Собранието. Како што изјави Дачиќ, се работи за јасна уставна процедура која налага за законот да одлучува претседателот на државата, а не владата, пренесува српската агенција Бета.
„По повод повлекувањето на законот за експроријација од страна на владата, морам да потсетам дека владата не може да повлече закон кој е усвоен од парламентот. Ја чекаме одлуката од претседателот на Србија, дали ќе го потпише законот или не. Тоа е јасна уставна процедура“,
рече Дачиќ и ѝ порача на јавноста дека ќе биде известена за понатамошните случувања.
Дачиќ се изјасни откако денес на владина седница во соседна Србија се донесе одлука за повлекување на законот за експропријација од собраниска процедура.
Носењето на законот за експропријација и законот за референдум беа причината поради која Србија масовно се крена на нозе изминатите два викенди, протестирајќи и блокирајќи ги сообраќајниците ширум земјата.