Кон средината на јули во близина на Кремљ, Овсјеникова одржа протест, каде што носеше транспарент „Путин е убиец. Неговите војници се фашисти“. По потегот, Овсјеникова беше обвинета за „ширење лажни информации за руските вооружени сили“ по што беше во куќен притвор соочувајќи се со затворска казна до десет години
Руски суд нареди апсење на поранешната новинарка на руската државна телевизија Марина Овсјеникова, јавија дел од руските медиуми.
Овсјаникова е позната во јавноста по тоа што во март, откако започна војната во Украина, „влета“ во програма во живо на телевизија со натпис „Не за војна“.
Таа кон средината на јули во близина на Кремљ одржа протест, каде што носеше транспарент „Путин е убиец. Неговите војници се фашисти“. По потегот, Овсјеникова беше обвинета за „ширење лажни информации за руските вооружени сили“ по што беше во куќен притвор соочувајќи се со затворска казна до десет години.
Нејзиниот адвокат Дмитриј Захватов неделава изјави дека таа со ќерката побегнала од Русија.
Организацијата за безбедност и соработка во Европа (ОБСЕ) во август годинава ја осуди праксата за судски прогон на новинари во Русија велејќи дека новинарите не смеат да бидат казнувани за извршување на својата должност, но и дека притворот не треба да се користи како неправеден притисок врз медиумските работници.
Претставникот на ОБСЕ, Тереза Рибеиро, кажа дека континуираните и административни тужби против новинарите во Русија резултирале со пад на индексот за слобода на медиумите како и за пристапот до информации.
„Во текот на изминатите неколку недели, посветив внимание на значителен број нови судски прогони.. Овие случаи често се однесуваат на наводното ширење лажни информации за руските вооружени сили, што е казниво според новиот закон донесен по руската инвазија на Украина”,
кажа Рибеиро.