Можно е во наредниот период Владата да заземе став за луѓето коишто живеат во колективни станбени објекти и имаат миленици, на одредено растојание од објектите да можат да излегуваат со нивните миленичиња со цел извршување на нужните потреби, рече министерот за внатрешни работи Наќе Чулев.
Во изминативе денови граѓаните реагираа на мерките за ограничувањето на движењето и бараат да им биде дозволено да можат да ги прошетаат милениците и по 21 часот, односно по 16 часот за време на викендите.
Со реакции излезе и Здружението за заштита на животните „Анима мунди“ кои соопштија дека овие мерки ги засегаат околу 80 илјади граѓани кои живеат со миленичиња.
„Многу повозрасни граѓани, кои неретко живеат сами, имаат миленици, кои поради извршување на физиолошки потреби мора да бидат прошетани неколку пати во текот на денот, не само наутро, а некогаш и подоцна од 21 часот“,
велат од „Анима мунди“.
Тие појаснуваат дека со забраната за движење се засегнати минимум 80 илјади сопственици на миленици територијата на земјава кои немаат начин да го изнесат својот миленик ниту по 10 минути по временски период од 21 часа, што, пак, е неопходно тие да ги извршат физиолошки потреби.