Претседателот и петмина од членовите на Комисијата, дополнително, велат дека, следејќи го контекстот и интензитетот на нападите, прозивките и навредите, загрижени се оти е можно тие да преминат и во лични напади на нивната сигурност
За сето ова, велат од ДИК, денеска на средба во просториите на Комисијата била известена и амбасадорката на набљудувачката мисија на ОБСЕ/ОДИХР, Џилијан Стирк
Мнозинството членови на Државната изборна комисија (ДИК) денеска преку писмена реакција до медиумите изразија загриженост за, како што велат, неоснованите јавни политички притисоци и закани за кривична одговорност поради нивните одлуки по приговорите за парламентарните избори.
Реакцијата доаѓа од шестмина од вкупно седум члена на ДИК. Покрај претседателот на Комисијата, Александар Даштевски, зад неа стојат членовите Радица Ристеска, Оливер Ристоски, Борис Кондарко, Бобан Стојановски и Абдуш Демири.
Единствен кој, условно кажано, не е потпишан на писмената реакција испратена до медиумите е потпретседателката на ДИК, Дитмире Шеху.
„Со особена загриженост за настаните кои во јавноста се продуцирани од изјави на политички партии и носители на високи владини функции, кои се однесуваат на работата на ДИК во врска со постапувањето по приговорите за парламентарните избори, ве известуваме дека покрај тоа што сме лично понижувани и навредувани, исто така како членови во највисоката институција за организирање и спроведување на изборите, сме изложени и на неосновани и непримерени јавни политички притисоци и на закани за кривична одговорност поради донесените одлуки на ДИК“,
се наведува во реакцијата.
Претседателот и петмина од членовите на Комисијата, дополнително, велат дека, следејќи го контекстот и интензитетот на нападите, прозивките и навредите, загрижени се оти е можно тие да преминат и во лични напади на нивната сигурност.
Во врска со нивното постапување, тие велат дека ДИК во целост професионално, транспарентно и само врз основа на закон ги спровела изборите, што, како што додаваат е потврдено од сите домашни и меѓународни фактори.
„И покрај сите непријатности кои ги имаме, сепак со највисок степен на интегритет врз основа на јавна проверка на изборниот материјал ДИК ги утврди фактите и одлучуваше по приговори поднесени од различни учесници за 110 избирачки места, од кои врз основа на образложени докази усвои приговори за само седум избирачки места за кои имаше правна основа, додека сите останати 103 избирачки места, беа одбиени како неосновани и за нив немаше поднесено тужби од ниту еден учесник на изборите“,
се вели во реакцијата.
Според тоа, велат од ДИК, неприфатливи се и нападите, притисоците и мешањето на одредени политички партии и на поединци од техничката влада во изборните процедури, како и во во работата и одлучувањето на ДИК и на Управниот суд.
За сето ова, велат од ДИК, денеска на средба во просториите на Комисијата била известена и амбасадорката на набљудувачката мисија на ОБСЕ/ОДИХР, Џилијан Стирк.
Инаку, најгласни во реакциите по донесените одлуки на ДИК во врска со приговорите за гласањето на неколку избирачки места во петтата и шестата изборна единица се од коалицијата „Европски фронт“ предводена од Демократската унија за интеграција (ДУИ).
Коалицијата поднесе седум тужби на решенијата на Државната изборна комисија, за кои Управниот суд оформи предмети, а кои денеска се на дневен ред на Судот кој има рок да одлучи по нив до ноќеска на полноќ.
Од „Европски фронт“ излегоа со став оти на членовите на ДИК им бил извршен политички притисок преку партиски инструкции во однос на приговорите, а за ова, како што рекоа, ги информирале сите надлежни институции и меѓународниот фактор. Од коалицијата предводена од ДУИ обвинија за изборен инженеринг, чија цел, како што деновиве изјавија нејзини високи претставници, е да им се одземат еден до два пратенички мандати освоени на парламентарните избори одржани на 8 мај и на тој начин да ги потиснат како втора сила во Собранието според бројот на пратеници.
Претседателскиот кандидат на „Европски фронт“ и министер за надворешни работи во заминување Бујар Османи, во изјава за медиумите завчера рече дека донеле одлука да ги обжалат до Управен суд одлуките на ДИК што се однесуваат на петтата и шестата изборна единица.
Тој најави и дека ќе покренат пријави за членовите на Државната изборна комисија за, како што рече, кршење на правото на гласачите на слободно манифестирање на сопствената волја.
За ова вчера на прес-конференција реагираше и техничкиот премиер Талат Џафери, кој кажа дека од учесниците во изборите добил извештаи за обиди за изборен инженеринг чија цел е менување на соодносот на бројот на пратеници во Собранието.
„Во својство на премиер на Владата и одговорен за успешноста на изборниот процес имам добиено извештаи од учесници во изборниот процес за вознемирување во однос на обиди за изборен инженеринг со вонинституционален меѓупартиски договор за гласање и надгласување во Државната изборна комисија во врска со симптоматичните приговори поднесени од страна на учесниците во изборите. Според извештаите, овие претензии се изборен инженеринг и имаат за цел менување на соодносот на бројките во Собранието преку политички договор на маса“,
изјави Џафери на прес-конференцијата во Владата.
Во однос на добиените извештаи, ги повика институциите, а особено Управниот суд, да ја штити кредибилноста на изборниот процес, која, како што рече, е прифатена и поздравена од сите политички субјекти и од меѓународниот фактор, и да постапи законски и без партиски или политички директиви од која било страна. Со тоа, како што рече, нема да се фрли дамка врз волјата на граѓаните изразена на изборите.