Бугарскиот министер за надворешни работи Светлан Стоев најави дека ќе им даде целосна поддршка на македонските власти по повод трагичната сообраќајна несреќа во Бугарија во која загинаа најмалку 45 македонски државјани
Министерството за надворешни работи (МНР) на Бугарија, во рамките на своите надлежности, ѝ ја дава сета потребна помош на Република Северна Македонија во врска со несреќата на автопатот „Струма“. Ова го им го соопштил бугарскиот министер за надворешни работи Светлан Стоев на премиерот Зоран Заев, шефот на дипломатијата Бујар Османи и министерот за здравство Венко Филипче на средбата што денеска се одржа во Софија, соопштија од прес-службата на бугарското МНР.
Стоев претходно денеска ја пречека владината делегација во болницата „Пирогов“ во Софија, каде што ги посетија настраданите во тешката сообраќајна несреќа. За состојбата на пациентите и грижата за нив ги информираше директорот на болницата, проф. Иван Поромански.
Од надлежните бугарски институции, пак, е побарано да им се обезбеди приоритетен и непречен влез во Бугарија на роднините на загинатите и повредените, како и на претставници на медиумите од земјава со оглед на хуманитарниот аспект на случајот.
Бугарското Министерство во рамките на своите надлежности, како што соопштија, дава помош и на тим лекари од судска медицина, како и на вработени во Министерството за внатрешни работи на Република Северна Македонија, кои ќе пристигнат во Бугарија во врска со несреќата.