Бугарското Министерство за надворешни работи (МНР) порачува дека е отворено за дијалог со Северна Македонија, но и потсетува дека привремената влада нема надлежност да ја менува позицијата во однос на спорот со Скопје.
Во изјавата што ја пренесуваат бугарските медиуми, јавува дописникот на МИА, е наведено и оти Северна Македонија предложила телефонски разговор помеѓу двајцата шефови на дипломатиите, а тоа ќе се реализира штом ќе дозволи распоредот на привремениот министер Светлан Стоев.
„Бугарија отсекогаш била и останува отворена за отворен дијалог и соработка со Република Северна Македонија. Меѓувладин состанок може да се одржи кога ќе бидат исполнети потребните предуслови и услови. Одржување состанок во таков формат мора да биде полн со содржина. Во оваа смисла, потсетуваме дека годишниот извештај за работата на заедничката мултидисциплинарна експертска комисија за историски и образовни прашања треба да биде усвоен на претстојниот меѓувладин состанок. Ја користиме приликата да потсетиме дека министерот Стоев при стапување на должност рече дека бугарската страна останува отворена за дијалог, а привремената влада не е овластена да ја менува рамковната позиција на Бугарија, што беше усвоено со консензус од сите политички сили во Парламентот“,
се потенцира во изјавата на бугарското МНР.
Пораката на Стоев на која потсетуваат во денешната изјава, беше дадена пред два дена кога тој ја презеде функцијата од досегашната шефица на дипломатијата, Екатерина Захариева. Тој истакна дека бугарската техничка влада ќе продолжи да се придржува кон досегашните позиции на Бугарија за Република Северна Македонија и дека не треба да се шпекулира за евентуална промена на бугарската позиција во следните два до три месеци додека трае техничката влада.