Бугарската социјалистичка партија (БСП) е за свикување на Консултативниот совет за национална безбедност за прашањето за Северна Македонија. Ова го изјави лидерката на БСП, вицепремиер и министер за економија во бугарската влада, Корнелија Нинова, пишува дневник.бг.
„Секогаш е корисно ова тело да се состане, бидејќи таму се застапени сите партии и служби. Доколку има потреба, Советот ќе ја потврди својата досегашна позиција дека нема да го повлечеме ветото за Северна Македонија додека не се имплементира Договорот за добрососедство од 2017 година“,
коментира Нинова.
Во петокот бугарскиот премиерот, Кирил Петков, во видео-обраќање побара од претседателот Румен Радев да го свика Консултативниот совет за национална безбедност. Тој ги повика партиите, службите и шефот на државата повторно да разговараат за бугарското вето против почеток на преговори за членство на Северна Македонија во Европската Унија.
Желбата на премиерот дојде по двете важни посети на Бугарија оваа недела – на помошникот државен секретар на САД за европски прашања, Карен Донфрид, и на еврокомесарот за проширување, Оливер Вархеи.
Копретседателот на „Демократска Бугарија“, пак, ген. Атанас Атанасов, претходно го поздрави потегот на Петков да побара свикување на Советот.
„Бугарија има национален интерес Северна Македонија да стане членка на ЕУ за да можеме да бидеме опкружени со пријателски земји, но во моментов нема доволно јавна поддршка, ниту има подготвеност во парламентот да се укине ветото“,
рече тој.
Атанасов инсистираше на тоа дека ветото не може да се укине и дека се прават обиди да се дестабилизира владата преку ова прашање.
„Руски агентури се тие што се обидуваат вештачки да ја дестабилизира владата преку македонското прашање“, рече Атанасов, објаснувајќи дека во последните години упорно се работи на свеста на бугарското општество и дека „македонските партнери не соработуваат по ова прашање“.
„Има нешто недоречено“ во вчерашното видео-обраќање на Петков. Ова претходно денеска го изјави потпретседателката на Бугарија, Илијана Јотова, по барањето на премиерот.
Пратеникот од партијата на Слави Трифонов, „Има таков народ“, Станислав Балабанов, за БТВ коментира дека се потврдиле сомнежите на неговата партија за обврските на Бугарија кон Северна Македонија поради барањето на Петков за свикување на Консултативниот совет за национална безбедност. Според Балабанов, немало смисла да се свика Советот, бидејќи на претходната средба ова тело ја потврдило позицијата на Бугарија за Северна Македонија и оттогаш таа не се променила.
Ставот на Бугарија за Северна Македонија останува непроменет, изјави министерката за надворешни работи Теодора Генчовска, која е од редовите на партијата на Трифонов во бугарската владата. Таа објасни дека одлуката за свикување на Советот е целосно на претседателот и уверуваше дека не биле водени заткулисни разговори за укинување на ветото.
„Не знам зошто е направен таков повик од премиерот. Слушаме само – сакаме да го тргнете ветото, но не гледам конкретна акција од таа страна“,
додава таа.
Евентуалното симнување на ветото за Северна Македонија доведе до конфликт во владината коалиција поради постојаните обвинувања на „Има таков народ“ за „нерегулирани обиди на Кирил Петков и неговите советници да го заобиколат националниот интерес“, за што неодамна пишуваше Трифонов.
Претседателот Румен Радев е меѓу застапниците на тезата дека Бугарите прво мора да бидат вклучени во македонскиот устав како малцинство и дури потоа да се укине ветото. „Оваа позиција е неприфатлива за Скопје“, изјави минатиот месец за дневник.бг македонскиот министер за надворешни работи Бујар Османи. Неделава, пак, тој рече дека во спорот „топката е кај Софија“ и дека провокатори во Бугарија го саботираат процесот.