Свикувањето на Консултативниот совет за национална безбедност е целосно во надлежност на претседателот, кој по направени анализи ќе ја соопшти својата одлука во наредните денови. Ова го коментира потпретседателката на Бугарија, Илијана Јотова, по вчерашниот повик на премиерот, Кирил Петков, да се свика Консултативниот совет за преговорите меѓу Бугарија и Северна Македонија. Според Јотова, во вчерашната изјава на премиерот има недоречени работи.
„Не знам за никаков конкретен развој на оваа тема. Неговите аргументи беа навистина само за надворешна употреба. Ако владата постигнала некакви гаранции и договори, редно е и ние да ги знаеме. Згора на тоа, имаме три официјални документи на бугарската држава – рамковниот став на владата, декларацијата на Народното собрание и одлуките на Консултативниот совет, во кои се вклучени условите што ги има Бугарија. До овој момент не гледам ниту еден исполнет. Згора на тоа, во последниве месеци говорот на омраза изгледа повторно цвета, а можете да ги видите изјавите и интервјуата дадени од луѓе кои имаат сериозни политички и раководни функции во Република Северна Македонија. Значи имаше нешто недоречено во вчерашната изјава на премиерот“,
изјави бугарската потпретседателка Јотова.
Бугарскиот премиер, Петков, во видео-обраќање го повика претседателот на Бугарија, Румен Радев, да го свика Консултативниот совет за национална безбедност за состојбата со преговорите меѓу Бугарија и Северна Македонија.
Петков во видео-обраќање рече дека бугарската влада нема да направи ништо без широка национална согласност и усогласеност со коалицискиот договор на владејачката коалиција во земјата.