Поранешниот премиер Владо Бучковски, во дебата на „360 Степени“, зборуваше за вториот круг од претседателските избори и кои се следните чекори за СДСМ.
– СДСМ имаат простор да слават, но да не бидат еуфорични. Резултатот покажува дека СДСМ има сериозен проблем кој треба да го реши во следните месец, два – рече Бучковски.
Тој вели дека гласачкото тело покажа неверојатна зрелост, при една од најздодевните кампањи. Тој рече дека опасноста од нова политичка криза мотивирало дел од незадоволните гласачи на СДСМ да излезат за да не пропаднат изборите.
– Не би сакал да бидам во кожата на Заев. Едно е кадровската промена, а прекус е периодот до следните парламентарни избори за сериозната реформа која треба да се случи во СДСМ. Мора да има непосредни избори, бидејќи дел од општинските раководства се поразени. Не верувам дека тие може да направат чудо за една година, а тоа ќе има одраз и на локалните избори за две години – рече Бучковски.
Тој кажа дека со последните измени во статутот на СДСМ е направена вмровизација на партијата, со тоа што целиот товар за кадровската политика е во рацете на Заев и тоа треба да се смени и да има непосредни избори.
– Овој резултат покажува дека сериозно мора СДСМ да се трансформира во граѓанска мултиетничка партија, која ќе привлекува се повеќе гласачи не-Македонци, за да може да парира на ВМРО-ДПМНЕ, кои после овие избори станаа доминатна партија во македонското гласачко тело – рече Бучковски.