Спасувачките екипи и денеска трагаат по десетиците исчезнати лица, два дена по земјотресот со јачина од 5,6 степени според Рихтеровата скала што уништи област во провинцијата Западна Јава во Индонезија
Бројот на загинати во земјотресот што во понеделникот ја погоди Индонезија се искачи на 268. Околу 151 лице, пак, се водат како исчезнати, а повеќе од 1 000 се повредени, пишува Би-би-си.
Спасувачките екипи и денеска трагаат по исчезнатите лица, два дена по земјотресот со јачина од 5,6 степени според Рихтеровата скала што уништи област во провинцијата Западна Јава во Индонезија.
Според соопштенијата на локалните власти, голем дел од загинатите во земјотресот се деца кои посетувале религиозни часови во џамиите по завршување на часовите во училиште.
„Нашиот фокус е во следните три дена да ги пронајдеме оние што сè уште се водат како исчезнати“,
изјави Сухарјанто, шеф на Националната агенција за управување со катастрофи.
Според Националната агенција за управување со катастрофи, околу 58 000 лица се раселени по земјотресот кој предизвика лизгање на земјиштето кое затрупа илјадници домови и луѓе.
Повеќе од 2 300 згради и домови беа оштетени, од кои многу целосно се урнаа.
Индонезија се наоѓа на Пацифичкиот огнен прстен, област позната по чести земјотреси и вулкански ерупции.