Одреден број војници ќе бидат ставени во готовност, со цел да се распоредат на пумпите доколку има потреба за тоа
Владата на Велика Британија соопшти дека ја става армијата во состојба на готовност, како дел од мерките за решавање на кризата во синџирот на снабдување, што доведе до недостиг на гориво на бензинските пумпи.
Предупредувањето за недостиг на гориво предизвика формирање колони автомобили на бензинските пумпи, што доведе до тоа многу бензински пумпи да останат без гориво.
Ангажманот на армијата следуваше поради недоволниот број возачи на камиони.
Се наведува дека одреден број војници ќе бидат ставени во состојба на готовност, со цел да се распоредат за снабдување со гориво на пумпите доколку има потреба за тоа.
Возачите на воени цистерни ќе поминат специјализирана обука пред да бидат ангажирани.
Поради големата побарувачка за гориво, 50 до 90 отсто од бензинските пумпи во некои делови на Британија останале без гориво.
Британскиот министер за транспорт Грант Шапс изјави дека намалувањето на побарувачката за гориво е веќе видливо, бидејќи граѓаните го прифатија апелот да не купуваат повеќе отколку што им е потребно.