„Британска донација од 14 комплексни мобилни едници ќе служат за обука на припадниците на нашата македонска Армија, но се разбира и на сојузничките сили. Вкупната вредност на овој проект е 400 илјади фунти, што е значаен придонес во тоа што значи доопремување и развој на армискиот полигон „Криволак’“, истакна министерката за одбрана Славјанка Петровска
Северна Македонија денеска доби донација од Велика Британија која вклучува 14 мобилни единици за обука за припадниците на Армијата во урбана средина.
Примопредавањето на британската донација се изврши на полигонот „Криволак“, во присуство на министерката за одбрана Славјанка Петровска, специјалниот претставник на Обединетото Кралство за Западен Балкан, лорд Стјуард Пич и британскиот амбасадор во земјава, Метју Лосон.
„Британска донација од 14 комплексни мобилни едници ќе служат за обука на припадниците на нашата македонска Армија, но се разбира и на сојузничките сили. Вкупната вредност на овој проект е 400 илјади фунти, што е значаен придонес во тоа што значи доопремување и развој на армискиот полигон „Криволак’“,
информираше министерката Петровска.
Петровска нагласи оти ѝ е чест што Пич и Лосон можат лично да се уверат дека оваа донација ќе биде од голема полза за развој на нашите капацитети на нашата Армија.
Таа додаде дека Обединетото Кралство останува клучен сојузник на Северна Македонија, при што земјава, а особено Армијата секогаш може да смета на британска поддршка, не само како донација, туку и преку зголемување на капацитетите и развој на човечките капацитети во армиските редови.
Специјалниот претставник на Обединетото Кралство за Западен Балкан, лорд Стјуард Пич порача дека ова е уште еден доказ за билатералната соработка и билатералното партнерство помеѓу Северна Македонија и Обединетото кралство.
„Особено во овие моменти кога имаме војна на континентот, ова е уште еден доказ дека ние сме тука заедно да настапуваме во поглед на одбраната, во поглед на одвраќањето и во поглед на воспоставувањето на нашиот сојуз во рамките на одвраќањето од агресијата на Русија. Да истакнам дека НАТО е одбранбен сојуз на 30 суверени земји и нашата задача е всушност да претставуваме одбранбена алијанса и уште еден доказ е нашето присуство тука. Тука ќе ја поддржам министерката во нејзината изјава кога кажа дека заедно сме посилни, не е само флоскула, туку е едноставно начинот на којшто ние функционираме и начинот на којшто ние ќе се одбраниме од оваа агресија“,
нагласи Пич.