На возилото кое го произведе велешката фабрика работеле 15 инженери од земјава во соработка со колеги од Холандија. Амстердам, Утрехт и Ротердам први ќе почнат да го користат ова возило, а интерес за набавка на возилото кое целосно се произведува во Велес, има и во САД, Велија Британија, Јапонија …
Велешката компанија „Брако“ го создаде првото возило во Европа наменето за одржување хигиена во урбани средини кое наместо издувни гасови, испушта вода.
Возилото е произведено под брендот „Green Machines“ GM 500H2 и работи на водород. На неговото создавање работел тим од 15 инженери од земјава, во соработка со колеги од Холандија.
„Холандските градови Амстердам, Утрехт и Ротердам се први кои ќе ја одржуваат хигиената со овие велешки еколошки возила кои испуштаат вода, наместо издувни гасови и не загадуваат. Среќен сум дека вроди со резултат нашата посветеност да го намалиме и минимизираме човечкото влијание врз природата и максимално да ја зголемиме ефикасната употреба на ресурсите. Еко-визијата ја препознаа и во преостанатите земји ширум светот, па така интерес за новата еколошка машина за одржување хигиена во урбани средини има и од САД, Велика Британија, Јапонија, но и од скандинавските земји“,
изјави директорот на „Брако“, Иле Атанасов.
Компанијата „Green Machines“, која од октомври 2019 година е во сопственост на велешки „Брако“, има долгогодишна традиција во областа на производството на технолошки напредни и иновативни машини за одржување на хигиената во урбани средини и важи за глобален лидер со врвна репутација.
Инвестирањето во зелените машини, како и во нови технолошки постројки, е дел од поширок инвестициски и развоен циклус во „Брако“, каде што се вработени над 600 лица. Доминантното производство на велешката компанија (95%) е наменето за извоз во над 30 земји.