Високиот претставник на Унијата изјави во Скопје дека одлуките што ги донесе С Македонија во однос на руската инвазија во Украина уште повеќе ја поврзуваат нашата држава со земјите на ЕУ
На регионот сега му се потребни предвидливи и засилени процеси на интеграција. На С Македонија и е потребна кристално јасна европска перспектива, рече македонскиот премиер
Не можам да ветам точен датум, ама може да ветам волја за што побрз старт на преговорите на Северна Македонија и на Албанија со ЕУ. А каде што има волја има и начин за да се постигне тоа, изјави денеска во Скопје високиот претставник на ЕУ за заедничка надворешна и безбедносна политика, Жосеп Борел, по средбата со премиерот Димитар Ковачевски.
Одговарајќи на новинарски прашања околу можна одлука во јуни за старт на преговорите на земјава со ЕУ, Борел рече дека се прави се за тоа да се случи во првиот можен рок и дека се надева дека дотогаш ќе се разрешат билатералните прашања со Бугарија.
„Не можам да ветам, но можам да ве уверам дека правиме сè што можеме тоа да биде што побрзо. Се надевам дека дотогаш ќе се разрешат билатералните прашања, кои веќе не смеат да го загрозуваат овој процес, за која и земја кандидат да станува збор. Постојано проценуваме дека земјата е подготвена да почнеме преговори и тоа не е чиста реторика, туку изјави за намера“,
рече Борел, кој во неколку наврати изрази благодарност за усогласеноста на Скопје со политиките и санкциите на ЕУ кон Русија, нагласувајќи дека тоа претставува морален избор на идните членки на Унијата.
Високиот претставник на ЕУ го поздрави и, како што рече, новиот импулс со Бугарија.
„Знам дека имате очекувања и во право сте. Ги разбирам вашите чувства и можам да ве уверам дека перспективите на западен Балкан и почетокот на преговорите со С Македонија и со Албанија се висок приоритет на ЕУ“.
нагласи Борел потенцирајќи дека Скопје е „првата станица“ на неговата посета на регионот, како „одговор на еден варварски напад од Русија и Путин над мирољубивите соседи од Украина“.
Додаде дека одлуките што ги донесе С Македонија во однос на руската инвазија во Украина уште повеќе ја поврзуваат нашата држава со земјите на ЕУ.
Премиерот Димитар Ковачевски, на заедничката прес-конференција по средбата со Борел, рече дека проширувањето на ЕУ сега станува и стратегиско и безбедносно прашање.
„Земјите од Западен Балкан се тесно поврзани и блокадата на преговорите остава последици низ целиот регион. На регионот сега му се потребни предвидливи и засилени процеси на интеграција. На С Македонија ѝ е потребна кристално јасна европска перспектива“,
рече Ковачевски.
Во период на нестабилност, рече премиерот, како никогаш досега, се јавува потреба Европа да биде обединета и силна. Војната што се случува, додаде, е ризик за зголемено влијание на трети страни во регионот за што сите треба да бидеме исклучително внимателни и подготвени.
„Оставањето геостратегиска празнина во нашиот дел од Европа не е опција. Брзата интеграција на Северна Македонија и на регионот во ЕУ ќе обезбеди стабилност во Европа“,
рече Ковачевски.
Со колегата од Бугарија, додаде, е воспоставен нов принцип на соработка кој, според Ковачевски, е вистинскиот пат по кој ќе се дојде до решение на спорот.