Двете страни мора да се вратат на дијалогот, ова не е начин да се оди кон нормализирање на процесот во кој тие се ангажирани, нагласува Борел
Специјалниот претставник на ЕУ за надворешна политика и безбедност, Жозеп Борел, ги повика Белград и Приштина да ја деескалираат ситуацијата на северот на Косово, каде што косовските Срби од саботата ги блокираат патиштата поради апсењето на поранешниот полицаец Дејан Пантиќ.
Пред почетокот на состанокот на Советот за надворешни работи на ЕУ, тој истакна дека двете страни мора да се вратат на дијалогот.
„Треба да ја надминат тенденцијата да се судираат на улица, да прават блокади. Тоа не е начин да се бара договор. Тоа не е начин да се водат разговори. Тоа не е начин да се бараат решенија. Ова не е начин да се оди кон нормализирање на процесот во кој тие се ангажирани“,
рече Борел.
Тој додаде дека ЕУ смета оти ситуацијата ќе се смири откако ќе се договорат за регистарските таблички, „но, повторно, косовските Срби одговорија на апсењето на поранешниот српски полицаец со многу проблеми на улиците, блокирајќи ги патиштата, па дури и фрлајќи шок-бомби врз полицајци на ЕУЛЕКС.“
„Можете да разберете дека тоа не е прифатливо. Оваа закана за јавниот ред, ова насилство е неприфатливо“,
додава Борел.
Тој додаде дека е во контакт со премиерот на Косово, Албин Курти, со специјалниот претставник на ЕУ за дијалог меѓу Белград и Приштина, Мирослав Лајчак и српскиот претседател Александар Вучиќ.
„Знам дека двете страни сакаат деескалација и силно ги повикувам да го сторат тоа“,
рече Борел пред почетокот на состанокот на министрите за надворешни работи на ЕУ, Украина, Молдавија, Грузија, Ерменија и Азербејџан.