Американскиот државен секретар изрази длабоко сочувство до граѓаните на С Македонија и на Бугарија
Сочувство до граѓаните на Северна Македонија и на Бугарија упати денеска американскиот државен секретар Ентони Блинкен, поради големиот број загубени животи во автобуската несреќа во близина на Софија, како и во пожарот во дом за стари и изнемоштени лица во Бугарија.
„Стејт департментот и американскиот народ изразуваат длабоко сочувство до граѓаните на Северна Македонија и на Бугарија поради трагичната загуба на животи во денешната автобуска несреќа и вчерашниот пожар во дом за стари и изнемоштени лица. Нашите срца се со сите ужалени, а на повредените им посакуваме брзо закрепнување“,
напиша Блинкен на Твитер.
The @StateDept & American people extend our deep condolences to the people of North Macedonia and Bulgaria over the tragic loss of life in today's bus accident and in the nursing home fire. Our hearts go out to all those in mourning, and we wish a speedy recovery to the injured.
— Secretary Antony Blinken (@SecBlinken) November 23, 2021
Автобус со македонски регистерски таблички, кој се враќал од Истанбул, утрово во три часот по полноќ се запалил во движење на автопатот Софија-Благоевград, кај селото Бошнек. Во несреќата загинаа 45 патници, меѓу кои 12 деца, а седуммина се повредени.
Во пожар што вчера го зафати домот за стари и изнемоштени лица во селото Ројак, во источниот дел на Бугарија, загинаа девет лица, од кои некои се задушиле од чад, изјави висок претставник на бугарското Министерство за внатрешни работи.