Во годините што следуваат САД ќе продолжат со поддршката на Северна Македонија на нејзиниот европски пат, се вели во честитката
Американскиот Стејт департмент во име на САД, денеска испрати честитки до народот на Северна Македонија по повод 31 годишнината од независноста на земјата.
„Со отворањето на пристапните преговори со Европската Унија, Северна Македонија годинава направи oдличен напредок кон европските интеграции. Сојузништвото во Европа и тежнеењето по нашите демократски вредности е многу поважно сега од кога и да било“,
истакна државниот секретар Ентони Блинкен.
Во честитката се нагласува дека „во годините што следуваат САД ќе продолжат со поддршката за нашиот сојузник Северна Македонија во нејзиниот европски пат“.
Блинкен исто така укажа и дека „двете земји споделуваат демократски вредности и заложба за човекови права чија положба е силна во лицето на глобалните предизвици.“
„САД ќе продолжат да стојат до вас кога правите одличен напредок за зголемување на просперитетот на сите ваши граѓани, подобрувајќи го владеењето на правото и зацврстувајќи ги вашите демократски институции. Ви посакувам најдобри желби на овој посебен ден“,
порача државниот секретар Блинкен.