Практично, МРТ моментно нема ниту Програмски совет ниту Надзорен одбор, така што мандат за раководење со јавниот сервис има само уште директорот Марјан Цветковски, кој првпат беше избран уште во 2012 година
Здружението на новинарите на Македонија (ЗНМ) бара да се повлече одлуката на Програмскиот совет на МРТ за распишување јавен конкурс за избор на членови на Надзорниот одбор на јавниот радиодифузен сервис во услови кога мандатот на членовите на овој совет е истечен.
„Мандатот на Програмскиот совет истече во декември 2019 година. Од тие причини сметаме дека е проблематично тие да избираат нови членови на Надзорниот одборот кој треба да врши контрола на материјалното и финансиското работење на јавниот сервис во идните години. Освен тоа што мандатот на овој состав на Програмскиот совет е истечен, дел од членовите имаат и конфликт на интерес според законот и ова претставува дополнителен проблем за одлуките на ова тело“,
велат од ЗНМ
Реакција на ЗНМ
Како што се наведува во соопштението, со обидот да се изберат нови членови на Надзорниот одбор, се прекршуваат и препораките на Советот на Европа, конкретно препораката број 96 која се однесува на гарантирање на независноста на јавните сервиси. Во глава три од оваа препорака, која се однесува на работата на надзорните органи, се вели дека членовите треба да се изберат од тело предвидено со закон на начин со кој ќе се избегне ризик од политичко или друго влијание.
Со истечен мандат од пред еден месец, Програмскиот совет на МРТ пред неколку дена распиша оглас за избор на нов состав на надзорниот одбор на јавниот сервис. Кандидатите треба да имаат високо образование и најмалку петгодишно искуство од областа на материјалното и финансиско работење, а огласот трае 15 дена… Иако нема ништо спорно во сите елементи наведени во конкурсот, спорно е тоа што Програмскиот совет веќе нема мандат да избира членови на Надзорниот одбор.
Практично, МРТ моментно нема ниту Програмски совет, ниту Надзорен одбор, така што мандат за раководење со јавниот сервис има само уште директорот Марјан Цветковски, кој беше реизбран на функцијата во 2018 година. Неговиот реизбор наиде на многу реакции во јавноста, со оглед на тоа што се случи во период на ново парламентарно мнозинство, за разлика од 2012 година, кога Цветковски беше првпат избран на функцијата. Цветковски, всушност, остана директор затоа што беше избран од Програмскиот совет на кој минатиот месец му заврши мандатот, а беше избран во Собранието во 2015 година.
Заглавена реформа
Реформата на МРТ е една од точките во програмата на СДСМ за претходните парламентарни избори во 2016 година. Сепак, актуелниот состав на македонското Собрание, кој е пред самораспуштање, во изминатите три години не успеа да го разреши раководството на МРТ избрано уште во претходната гарнитура. Иако, во меѓувреме, по многу опструкции од опозицијата, беше донесен нов Закон за аудио и аудиовизулени услуги, кој предвидува и нов концепт на избор на раководните тела на МРТ и на Агенцијата за аудио и аудиовизуелни медиумски услуги (ААВМУ), изборот на нови раководни тела на овие институции, со месеци, е заглавен во Комисијата за избори и именувања.
Во јули минатата година Комисијата за избори и именувања ги утврди листите на кандидати за членови на советите на МРТ и на АВМУ, кои се пријавиле на конкурсот што го распиша Собранието. За Советот на МРТ, кој треба да брои 11 члена, се пријавени 18 кандидати, а за седумчлениот Совет на АВМУ – 28 кандидати. Пријавените на конкурсите требаше да ги бранат своите тези на јавна расправа во септември, но работата застана тука.
Опструкции во собраниската комисија
Претседателот на Комисијата за избори и именувања Илија Димовски од ВМРО-ДПМНЕ не одговори денеска дали има шанси до распуштањето на овој пратенички состав да свика седница за продолжување на процедурата за избор на членови на раководствата на МРТ и на АВМУ. Една од причините за блокадата е тоа што со ова собраниско тело претседава пратеник од опозицијата, која го контролира и мнозинството. Отежнувачка околност е и тоа што, согласно со новиот Закон за медиуми, треба да се обезбеди двотретинско мнозинство за избор на членовите на советите на јавниот сервис и на АВМУ – и во матичната Комисија и на пленарна собраниска седница.
Од ЗНМ, во денешното соопштение, потсетуваат дека во повеќе наврати реагирале дека членовите на Комисијата за избори и именувања мора да најдат заеднички јазик и да ги изберат новите членови на Советот на МРТ.
„Бараме оваа Комисија итно да одржи седница и да ги избере најсоодветните кандидати за Програмскиот совет, како и за Советот на АВМУ со цел да се овозможи почеток на медиумските реформи во овие две институции“,
велат од ЗНМ.