Пред крај сме со преговорите со синдикатите за општиот колективен договор и новата методологија на плати која понатаму ќе се усогласи со сите закони во државата. Ова значи иста методологија за плати и за мојот сограѓанин кој работи на најниското работно место и за претседателот на државата, вклучувајќи го и премиерот, вели вицепремиерот Битиќи
Платите во јавниот сектор се регулирани со преку 200 различни законски или подзаконски акти. За жал, мора да признам дека некој сакал намерно да не води грижа во нашата држава за регулирање на системот за плати во јавниот сектор. Решението е иста методологија за плати за сите во јавен сектор, вели вицепремиерот за економски прашања Фатмир Битиќи.
„Ова значи иста методологија за плати и за мојот сограѓанин кој работи на најниското работно место и за претседателот на државата вклучувајќи го и премиерот. Иста методологија за плати која ќе биде усогласена со синдикатите и кога тоа ќе го направиме праведноста, правичноста и солидарноста ќе биде покажана на дело. Сакам да оставам системско решение. Сметам дека во нашата држава доволно беше уценување и преговарање за плати и дали треба и колку треба луѓето да бидат платени. Еднаш засекогаш мораме да се грижиме да носиме системско решение. Тоа е новиот дух на креирање на решенија и политика во нашата земја“,
рече Битиќи одговарајќи на новинарско прашање пред почетокот на Македонско-финскиот бизнис-форум во организација на Стопанската комора.
Во овој период, рече Битиќи, пред крај сме со преговорите со синдикатите за општиот колективен договор и новата методологија на плати која понатаму ќе се усогласи со сите закони во државата.
На прашањето дали се согласува со барањето на синдикатот основа за пресметка на плата да биде просечната и да се исплаќа веднаш од оваа година, а не како што рече министерот за финансии од наредната, Битиќи даде потврден одговор.
„Се согласувам и дури мислам дека синдикалните организации веруваа дека ние нема да го прифатиме, но на последната средба го прифативме нивниот предлог. Секако, бидејќи беше само предлог без никакви финансиски калкулации, рековме дека треба сите заедно да ги дефинираме коефициентите на сложеност на сите работни места, во целиот јавен сектор. Што побрзо тоа го направиме и го затвориме веднаш треба да почнеме да гледаме, според можностите, тоа да го спроведеме. Методологијата да се аплицира од оваа година. Не може да има очекување дека ние ќе стигнеме до вистинската цел, а тоа е целосно зголеми плати како што синдикалните организации веруваат и тоа за 50, 60, 70, 80 отсто и тоа веднаш, денеска, сега. Тоа е период на приспособување кој би требало да почне најбрзо што може да се аплицира“,
додаде Битиќи велејќи дека местото на договарање е дијалогот на Економско-социјалниот совет и ниедно друго место.
Прашан за тоа со кој закон вработените во Министерството за финансии добија ретроактивно зголемување од 30 отсто, Битиќи рече дека тоа е направено согласно со Законот за органско буџетирање и додаде дека не е ретроактивно исплатено бидејќи законот стапил во сила од 1 јануари годинава и за него имало барање за автентично толкување од Собранието што е направено во меѓувреме поради што се исплатени зголемените плати.
„Тоа е закон кој еднаш засекогаш треба да дефинира низа на работи во делот на управување со јавните финансии меѓу кои предвиденото решение било такво какво што е сега во овој момент во Министерството за финансии. Законот за органско буџетирање беше скоро три години во собраниска процедура и се случи да се изгласа некаде пред Нова година и секако треба да се спроведе од 1 јануари“,
додаде вицепремиерот Битиќи.