Најавата доаѓа откако од Комисијата за заштита на конкуренцијата се изјаснија дека тие не можат самоиницијативно да ги проверуваат трговците дали здружено ги договараат цените и дека за да постапат, потребно е да биде поднесена претставка
Во вторник, вицепремиерот за економски прашања Фатмир Битиќи ќе поднесе претставка до Комисијата за заштита од конкуренцијата за да се провери дали трговците здружено ги зголемуваат цените на основните прехранбени производи.
„Во вторник во 10 часот ќе одам во Комисијата за заштита од конкуренција да доставам претставка за да почнат да постапуваат во млечната индустрија и во други индустрии“,
изјави денеска Битиќи.
Ваквата најава доаѓа откако од Комисијата за заштита на конкуренцијата се изјаснија дека тие не можат самоиницијативно да ги проверуваат трговците дали здружено ги договараат цените и дека за да постапат, потребно е да биде поднесена претставка.
Во вторник на седница на Владата, како што најави Битиќи, ќе биде донесена и мерка во делот на млечната индустрија поради недостигот на млеко, со што производителите ќе може соодветно да интервенираат.
„Ние не може да им ги намалиме цените за тие да работат со загуба. Тоа никој не го очекува, но исто така не можеме да дозволиме на грбот на производителите и на грбот на граѓаните, најголемиот профит да го прават оние кои ги продаваат продуктите“,
рече Битиќи.