„Ве поканувам в сабота да ми се придружите, ќе одиме во шест различни маркети со различни брендови да ги видиме цените на еден до два производа и ако има навистина зголемување в понеделник ќе отидеме во Комисијата за заштита од конкуренција да поднесеме претставка“, вели вицепремиерот
Доколку се утврди дека има картелски здружувања меѓу трговците по укинувањето на мерката „Гарантирана цена“ на прехранбените производи, ќе поднесам нова претставка до Комисијата за заштита од конкуренција, вели вицепремиерот за економски прашања Фатмир Битиќи.
Битиќи најави дека в сабота ќе оди да посети шест различни маркети за да види дали има зголемување на цените кај прехранбените производи, а ги покани и медиумите да му се придружат.
„Ве поканувам в сабота да ми се придружите, ќе одиме во шест различни маркети со различни брендови да ги видиме цените на еден до два производа и ако има навистина зголемување в понеделник ќе отидеме во Комисијата за заштита од конкуренција да поднесеме претставка“,
рече Битиќи одговарајќи на новинарски прашања по денешното потпишување на Меморандумот за соработка со ЏЕТРО.
Според него, од извештаите од Државниот пазарен инспекторат досега нема индиции дека има договорено зголемување на цените.
„Сакаме да видиме дали има индиции за договорено зголемување на цени. Ако има зголемување само во одреден маркет, тоа може да е од икс причини, односно може да биде местото на добавувачите или од каде што го земаат, да имаат повисоки цени, но ако се случи кај сите истовремено за ист производ, тогаш може да има индиции за договорено зголемување на цени. Такви индиции досега од извештаите што ги читаме од ДПИ, не добиваме“,
додаде Битиќи.
Вчера, од Комисијата за заштита на конкуренцијата информираа дека може да поведат постапка против претпријатија во два случаи. Првото е за злоупотреба на доминантна позиција односно доколку претпријатието поседува доминантна позиција и ја злоупотребува во своето работење кон своите добавувачи или спрема своите купувачи. Втората постапка која може да ја поведат е за постоење на ограничувачки договори односно договори помеѓу конкуренти со кои се ограничува конкуренцијата на пазарот, вклучувајќи и договарање на цените.
„За да се утврди договарање на цените потребно е Комисијата да има цврсти докази кој се договарал, кога и за кои производи односно за кои цени. Досега Комисијата нема конкретни индиции за постоење на забранет договор помеѓу одредени синџири на супермаркети за одредени производи. Комисијата може да изврши прибавување на податоци на лице место, кое претставува еден вид на претрес, но за да го направи тоа потребно е да има силни индиции за тоа каде постојат докази за недозволено договарање на цени“,
се вели во соопштението од Комисијата.
Оттаму ги повикаа сите кои имаат индиции за постоење на забранет договор да ја известат Комисијата.
Од 1 март се укина мерката за гарантирани цени на одредени прехранбените производи како лебот, млекото, јогуртот, тестенините, дел од месните производи, како и на безалкохолните пијалаци и пивото. Власта очекува дека зголемување на цените ќе се спречи со Законот за нефер трговски практики кој денеска помина во Законодавно-правната комисија по што треба да се најде на пленарна седница.