Имајќи предвид дека и во државата веќе цената за природниот гас ни зависи од цената на ТТФ берзата во Холандија, во најголем дел – седумдесетина проценти, а 30 проценти е од нафтениот индекс. Значи, очекуваме дека овој `price cap`, кој што ќе видиме како ќе функционира и како ќе се имплементира, ќе има позитивно влијание кај нас од аспект на намалување на цената на природниот гас, вели Бислимоски за МИА
Претседателот на Регулаторната комисија за енергетика и водни ресурси, Марко Бислимоски очекува одлуката на земјите-членки на Европската Унија за воведување плафон на цената на природниот гас да има позитивно влијание за земјава.
По неколкумесечни разговори и преговори министрите за енергетика на земјите-членки на ЕУ во понеделникот, на 19 декември се договорија да ја ограничат цената на природниот гас.
Воведувањето на плафон беше на предлог на Грција, кој Атина го достави во во Брисел пред неколку месеци.
Механизмот за ограничување на цената на гасот ќе се активира кога цената ќе достигне 180 евра за мегават час и 35 евра повеќе од референтната цена на течниот гас за период од три последователни дена.
„Се надевам дека ќе влијае, имајќи предвид дека и во државата веќе цената за природниот гас ни зависи од цената на ТТФ берзата во Холандија, во најголем дел, седумдесетина проценти, а 30 проценти е од нафтениот индекс. Значи, очекуваме дека овој `price cap`, кој што ќе видиме како ќе функционира и како ќе се имплементира, ќе има позитивно влијание кај нас од аспект на намалување на цената на природниот гас“,
вели Бислимоски за МИА.
Бислимоски, кој учествуваше на состанокот на 53. Борд на регулатори на Енергетската заедница што се одржа во Атина, посочува дека и претставникот на Агенцијата за соработка на енергетските регулатори на ЕУ (АЦЕР) за време на дискусијата се осврнал на конкретната одлука.
„Од она што го слушнавме од нашиот колега од АЦЕР е дека тоа е еден посложен механизам и на нив им треба анализа за да видат конкретно како тоа би влијаело на крајната цена што ја плаќаат потрошувачите, но сметам дека е добар сигнал, имајќи предвид дека и минатата недела и оваа недела цената на природниот гас на ТТФ берзата е намалена за околу 15-20 проценти, па да видиме дали тој тренд ќе продолжи и во јануари со цел да имаме малку од малку порелаксирана ситуација“,
вели претседателот на Регулаторната комисија за енергетика и водни услуги.
На крајот на септември годинава министрите за енергетика на 15 земји-членки на Европската Унија (Грција, Хрватска, Франција, Бугарија, Белгија, Италија, Латвија, Литванија, Малта, Полска, Португалија, Романија, Словачка, Словенија, Шпанија), преку писмо испратено до комесарот за енергетика Кадри Симсон побараа ЕУ да воведе ограничување на големопродажната цена на природниот гас .
Писмото, како предлог и иницијатива од Атина, тогаш го објави грчкиот премиер Кирјакос Мицотакис, кој сега, по постигнатиот договор, ја поздрави одлуката, коментирајќи дека „механизмот за корекција на пазарот, грчкиот предлог доставен пред девет месеци, конечно беше усвоен од министрите за енергетика“.