На прашањето дали во декември годинава ќе почне процесот на уставните измени, премиерот посочи дека сега потребно е она што го предлагаат да биде прифатено, односно кога бугарскиот парламент ќе го ратификува Пристапниот договор на нашата држава во рамките на ЕУ, да важат тие уставни измени
Сето она што требаше да биде содржано во писмото веќе е разговарано со претседателката на Европската комисија, Урсула фон дер Лајен, која пред два дена беше во посета на земјата. Сега сето тоа би било беспредметно. Ова денеска го рече премиерот Христијан Мицкоски при посетата на скопски Аеродром за најавите дека ќе испрати писмо до европските лидери во кое ќе ги информира за македонските позиции во однос на продолжувањето на процесот на интеграција кон Унијата, посочувајќи дека позицијата поврзана со уставните измени е јасна.
„Мислам дека тука никој не треба да има дилема дека ќе има ниту милиметар понапред, ниту милиметар поназад“,
рече тој.
На прашањето дали во декември годинава ќе почне процесот на уставните измени, премиерот посочи дека сега потребно е она што го предлагаат да биде прифатено, односно кога бугарскиот парламент ќе го ратификува Пристапниот договор на нашата држава во рамките на ЕУ, да важат уставните измени.
„Мислам дека тоа е фер решение, имајќи ја предвид состојбата до која нѐ доведе Владата во која клучниот збор го имаше Бујар Османи, а позади себе ги водеше Маричиќ и Ковачевски“,
вели премиерот.
Сега дознава, како што рече, што сѐ се правело во тој период и информациите се шокирачки.
„Затоа сега жестоко се бориме. Друг тип на уставни измени, додека сум премиер, нема да има. Ултиматуми и диктати не прифаќам“,
рече тој.
Премиерот по средбата со Фон дер Лајен пред два дена во Скопје рече дека очекува Европската Унија заедно со нас да помогне во изнаоѓање начини како да го продолжиме нашиот евроинтегративен пат.
До конечната цел – што поскоро членство во ЕУ – според премиерот Мицкоски, може да се дојде ако се направи синергија од вредностите на кои се темели Европската Унија, од една страна, и на зачувувањето на гордоста и достоинството на македонските граѓани, од друга страна.