Кабинетот на претседателот во согласност со потпишаниот Колективен договор предвиде покачување на плата од пет отсто само за државните службеници кои се вработени во кабинетот на претседателот. Ова покачување не се однесува за претседателот, именуваните лица и посебните советници во Кабинетот. Средствата за Буџетот во 2023 година се обезбедени преку сопствени заштеди во буџетот на нашата институција и за ова не се побарани дополнителни средства од МФ, велат од кабинетот на Пендаровски
Претседателот Стево Пендаровски и вработените во неговиот кабинет сè уште не зеле плата за минатиот месец, иако таа требала да им легне на сметките на 1 јануари. Образложението што го добиле од Министерството за финансии е дека во буџетот за 2023 година нема дополнителни средства за исплата на плати за вработените во кабинетот на претседателот што од кабинетот на шефот на државата го сметаат за неосновано.
„Кабинетот на претседателот во согласност со потпишаниот Колективен договор со Синдикатот на вработените, предвиде покачување на плата од пет отсто само за државните службеници кои се вработени во кабинетот на претседателот. Ова покачување не се однесува за претседателот, именуваните лица и посебните советници во кабинетот. Средствата за буџетот во 2023 година се обезбедени преку сопствени заштеди во буџетот на нашата институција и за ова не се побарани дополнителни средства од Министерството за финансии“,
посочуваат од кабинетот на Пендаровски.
Барањето за финансиски средства за плата за јануари 2023 година, кое кабинетот на претседателот го достави до Министерството за финансии е изработено во согласност со Законот, во рамки на одобрените средства во Буџетот на Република Северна Македонија за 2023 година, буџетскиот корисник – претседател и во согласност со Колективниот договор за вработените при претседател на Република Северна Македонија, додаваат оттаму.
Реакција стигна и од премиерот Димитар Ковачевски кој нагласи дека претседателот е посебна институција.
„Не знам каков колективен договор има. Ќе си седнат со Министерството за финансии, ќе разгледаат колку имаат во буџетот, ќе споредат со Колективниот договор, ќе се договорат и на крај ќе донесат решение како што има решение за сè“,
рече денеска Ковачевски одговарајќи на новинарски прашања по посетата на „Виталиа“.