Штом се избере министер за правда, ние сме подготвени следниот ден да настапиме на пазарот, зависно од оценките на банките кои ќе посочат кои се добри позиции. И следната трансакција ќе биде успешна. Инвеститорите покажуваат интерес за повторно да се јават, вели министерот за финансии
Министерството за финансии е подготвено и може веднаш да излезе на меѓународниот пазар со издавање на еврообврзницата, штом во Собранието заврши процедурата за избор на министер за правда. Очекувам и следната аукција да биде успешна. Зад овој процес стои конзорциум на банки со кои 20 години земјата реализира успешно издавање еврообврзници, а постои и интерес од инвеститорите што учествуваа на аукцијата на 9 март повторно да учествуваат, истакна министерот за финансии Фатмир Бесими.
Повторената аукција, како што рече Бесими во гостување во „24 анализа“, не повлекува финансиски трошок бидејќи тоа е во рамки на договорот што го има земјата со конзорциумите банки, кои во овој процес не следат 20 години.
„Штом се избере министер за правда, ние сме подготвени следниот ден да настапиме на пазарот, зависно од оценките на банките кои ќе посочат кои се добри позиции. И следната трансакција ќе биде успешна. Инвеститорите покажуваат интерес повторно да се јават. Ние издаваме познат производ за нив, не доцниме со исплати и тоа е познато на нив. Нема нови трошоци за повторената постапка“,
нагласи министерот Бесими.
Тој потенцира дека каматната стапка ќе го одреди и износот на кој ќе биде издадена еврообврзницата.
„Ние имавме плафон на 800 милиони евра и одлучивме да издадеме еврообврзница од 600 милиони евра за да ги платиме обврските кон странство, односно еврообврзницата што доспева во јуни од 450 милиони и каматите околу 30 милиони за истата, како и други заеми што доспеваат кон странство. Идејата беше тоа што ќе го обезбедиме со еврообврзница да платиме она што е обврска кон странство. Доколку каматата е над седум проценти и повеќе, може да се разгледа опцијата да се издаде еврообврзница само на 500 милиони евра, па во текот на годината да се видат повторно условите, односно доколку се олабават каматите, затоа што се очекува во втората половина од годината инфлацијата да се намали и растот да се зголеми, но имаме многу непознати и никој не знае што ќе се случи во Украина“,
истакна министерот Бесими.
Појаснувајќи ја постапката поради која ќе се повтори аукцијата за издавање на еврообврзница, Бесими рече дека тоа е поука и најави дека ќе се предложат законски измени со кои нема да се потпишува мислењето само од министер за правда, туку тоа да може да биде и друг член од Владата.
Министерството за финансии, пред две недели, издаде четиригодишна еврообврзница во висина од 600 милиони евра, со каматна стапка од 6,5 отсто, пари наменети за покривање на стари долгови и на еврообврзницата од 2016 година кои доспеваат оваа година.
Барањето од Министерството за финансии за правно мислење до правда го доставиле откако министерот на правда Никола Тупанчески си поднесе оставка и затоа на барањето немаше ставено потпис.
Бесими и тогаш појасни дека агентите и инвеститорите се навремено известени за административната пречка во врска со издавањето на еврообврзницата и тие ја немаат запишано – следствено на тоа не можеле да тргуваат со неа на секундарниот пазар.